ORANJESTAD (AAN): Relaciona cu e ultimo noticianan relaciona cu paramento di fiesta na cierto localidadnan, Alto Comisario Irma Gordon a splica den conferencia di prensa di CrisisTeam cu akinan ta trata di un calamidad y den esaki e lider ta Departamento di Salud.
No ta algo di orden publico, a remarca. DVG ta yama Polis ora cu nan bay cu nan hendenan cu si ta autorisa pa haci locual mester haci y no cumpli, e ora nan ta yama Cuerpo Policial pa bay yuda nan, Gordon a indica.
Despues di esey, a bisa, KPA tin autorisacion pa wak kico ta pasa y si ta cuadra cu locual DVG a bisa pa por sigui cu e trabao.
Alto Comisario a wordo puntra pa prensa pakico den cierto casonan polis no a actua. E a indica cu nan no a actua pasobra nan no a wordo yama pa esey. Nan a wordo yama pa dos lugar so y esey ta e informacion cu e a haya.
El a agrega cu e no sa cuanto hende tin den Task Force, pero KPA ta acudi ora cu Task Force yama nan.
