ORANJESTAD (AAN): Recien den Corte di Husticia a trata e caso penal cu Ministerio Publico a cuminsa contra e homber J.A. di 37 aña, kende na Maart 2023 a worde haya cu un plantacion di marihuana. J.A. a bisa Hues cu e tin e plantacion pa traha remedi pa ‘hala’ pa su tata, kende ta diabetico y a perde pianan. Hues a bisa J.A. cu ta prohibi
pa tin plantacion di marihuana y como tal traha remedi.
Plantacion: E acusacion contra J.A. ta cu entre 1 Januari 2022 y 17 Maart 2023 e tabatin un plantacion di 214 mata di marihuana. Hues a puntra J.A. si ta berdad y J.A. a admiti cu ta na Februari 2023 el a cuminsa planta. En total 214 mata a keda confisca. El a bisa Hues cu e tabata kier traha remedi for di e matanan di marihuana.
El a splica cu den pasado caba el a traha esaki. E ta pa hala curpa. El a splica cu e ta usa alcohol 70 % y ta pone e blachinan di marihuana aden. Despues ta saca e blachinan. E tabata usa esaki riba su tata y su tanta. Hues a puntra J.A. si e ta usa e matanan pa huma. J.A. a bisa Hues cu e no ta usa e matanan pa huma. Su intension tabata pa traha e remedi. El a splica cu e ta huma ora cu amigo of amigonan ta humando.
Traha remedi pa yuda tata: Hues a bisa cu for di raport di Polis por compronde cu Fiscal a duna permiso pa bay detene e ruman homber di J.A. Tambe tin permiso di Hues Comisario pa listra cas di J.A. Den e cura patras a haya e plantacion di 214 mata y a detene J.A. A manda 5 pida di mata pa laboratorio pa determina si ta marihuana. Laboratorio a constata cu e matanan tin THC y ta marihuana.
Riba pregunta di abogado mr Journey Tromp, J.A. a bisa cu su tata ta diabetico y a perde su dos pianan. Pesey el a haci plantacion pa yuda su tata. Despues di a bisa esaki, por a mira J.A. a baha cabez y cuminsa yora.
Hues a mustra cu J.A. na 2020 tabatin un sentencia di un caso di 2018, caminda a haya plantacion grandi di marihuana. El a worde declara liber pasobra no por bisa na unda a haya e plantacion di marihuana. Hues a bisa cu a haya e plantacion pero no por bisa exactamente cual cas.
Fiscal: Fiscal ta haya legalmente proba cu J.A. tabatin plantacion di marihuana. Fiscal a bisa cu e motibo pa e plantacion esey no por a base di ley. Fiscal ta considera J.A. cu ta promer biaha cu e ta bin den Corte pa un caso di droga. El a exigi 6 luna di prison, di cual 3 luna ta condicional cu 2 aña di prueba. El a exigi pa destrui e plantacion.
Abogado: mr. Journey Tromp a bisa Hues cu J.A. no a nenga cu e tabatin plantacion. E abogado a cuestiona e forma di actua di Polis. El a mustra cu tabatin investigacion na un cas na Madiki y Polis a dicidi bay den e otro cas. Despues ta bruha nan den otro.
Aki atrobe no tabatin permiso di Hues Comisario pa haci investigacion na e cas. El a pidi Hues pa tene cuenta cu circumstancia personal di J.A. El a mustra cu den un caso di 148 mata di marihuana, a duna castigo mas abao y trabao pa comunidad.
Sentencia: Hues a sera tratamento di e caso y a dicta sentencia di biaha. Hues a bisa cu tin permiso di Hues Comisario pa drenta e cas y no ta haya manera abogado a bisa cu a viola e procedura.
Pa cu e castigo, Hues a tene cuenta cu e cantidad di matanan y cu ta promer biaha cu J.A. ta cay sera pa droga. Hues a bisa cu 214 mata di marihuana ta un caso serio. Hues no ta accepta cu J.A. kier traha remedi pa yuda su tata. Hues a confirma exigencia di Fiscal. El a condena J.A. na 6 luna di prison di cual 3 luna ta condicional cu 2 aña di prueba. E matanan lo worde destrui.
