Caso di Diaranson mainta --- ORANJESTAD (AAN): Poco dia ey tabata habitantenan di Sero Preto cu a dicidi duna ladronnan un sota.
Awor ta habitantenan di Paradera a dicidi na duna e recidivista Koki un sota.
E persona aki cu a cuminza bira un persona hopi indeseable den Piedra Plat, Casibari, Hooiberg, Sero Preto, Rooi Afo, Paradera, Papaya, Shiribana, Tanki Leendert, y hasta Tanki Flip, ta sigui comete su fechoria. E ta busca forma pa horta kico cu ta, pa asina e bay cambia e material ey pa droga.
Su forma di traha ta cu anochi e ta pasa rek na man di porta di tur auto cu e topa cune, y si acaso e haya uno caminda e doño a lubida di pone na lock, of si acaso e lock no ta funciona bon, e ta core drenta y horta kico cu ta di balor. Hasta skeiro di cabey e ta bay cune, aunke e mes ta pelon.
Tur cos ta mustra cu Diamars anochi e lo a horta pertenencia di e hendenan eybanda. Y Diaranson mainta ata Koki a bolbe pasa den e area. Aki ta unda cu habitantenan furioso a cuminza bay riba dje y a dune un bon sota.
Pa el a huy for di su man, el a rek di tur forma pa huy. Hasta su camisa a kibra completo y el a keda casi sunu. El a haye ta core como 350 meter bay zuid pa bay sconde tras di un bari di sushi na un cas na Paradera.
Loke e habitantenan aki a haci ta loke tabata di spera di basta tempo. Hendenan ta fada cu nada ta wordo haci pa evita cu e recidivista aki ta sigui cana riba caya ta teroriza habitantenan, y horta articulonan di balor sea for di auto, of poni den cura di cas.
Pesey mes nan a dicidi na dune un sota, cu e speranza cu e lo no pasa mas eynan.
Diferente unidad di Polis a yega y asina a bin haya Koki sinta abao ta tril ainda di e sota cu el a caba di haya. Mientras cu Polis ta papiando cune, diferente habitante a yega y nan a bin bisa cu cada uno di nan a bira victima di ladronicia na su man.
Algun a hasta haya Koki ainda cu nan pertenencia eybao. Por lo menos un di e victimanan a bisa cu e ta bay entrega keho di ladronicia, y pesey Polis a aresta Koki un biaha mas.
Habitantenan ta pidi Ministerio Publico auxilio. Ta hopi hende den ultimo 6 luna a bira victima di Koki. Cuanto mas tin di bay warda prome cu yega na un solucion?
