Desde November caba ta vigilando nan
- Dos persona Dominicano a keda deteni
- Homber di edad Mericano tambe a ser gara
ORANJESTAD (AAN): Vocero di Polis riba Diamars a confirma na DIARIO, cu un investigacion cu ta drentando su di tres luna caba, a bin ta produci varios ‘fruta’, ora cu danki na experticio, analisis tecnico y forensico, a logra pone man riba varios persona cu ta envolvi den algo cu tin di haber cu traficacion di droga.
E biaha aki, e investigacion tabata resorta cerca e expertonan di Unit Narcotica di Cuerpo Policial di Aruba. E oficialnan aki no ta drumi, ta perdiendo hopi soño cu un solo meta, esta di ta trahando duro riba diferente caso.
Specificamente un caso cu desde luna di November a aparece den nan spectrum di investigacion, y di trempan a bin ripara cu esaki ta un caso grandi di traficacion pisa di droga. Di e forma ey e oficialnan hudicial aki a cuminza controla meticulosamente, haciendo uso di diferente herment cu tin na nan disposicion. Y asina e puzzle a cuminza forma dilanti nan, y a bin realiza cu ta trata aki di un grupo criminal, unda nan mes ta encarga pa importa, y alavez bende droga na Aruba tambe.
Polis a confirma, cu durante e investigacion, Unit Narcotica di Polis a detene diferente sospechoso cu ta meti den e caso serio.
Diamars mes, Polis a informa cu e sospechosonan ta e homber J.E.M. di 28 aña naci na Republica Dominicana. Tambe un muher J.M.M.M. di 29 aña naci tambe na Republica Dominicana. Tambe a detene e homber di inicial M.L.S., di edad grandi di 67 aña naci na Merca. Nan tur tres ta poni como sospechoso den e dicho caso aki.
Durante e investigacion aki nan a haci dos razzia tambe unda a presenta di sorpresa na e casnan, y ora di rista den e lugar, a haya y confisca un cantidad di placa como tambe diferente tipo di droga.
Unit Narcotica di Polis no a finalisa, como cu nan ta insisti cu e caso grandi aki keto bay ta den pleno investigacion. No ta descarta cu lo tin mas detencion den e dianan venidero. Ministerio Publico ta dunando tur su cooperacion pa cu e adelanto di e caso.
Cuerpo Policial ta haci un suplica pa e persona cu sa algo of a wak algo yama e tipline di polis cu ta 111-41. Kedabo trankil cu bo anonimidad lo keda garantiza.
