Awemainta Hues Comisario lo dicidi esey
- Chauffeur femenino tin apenas 24 aña di edad
- Tur cos ta mustra cu e tabata basta bao influencia di alcohol
ORANJESTAD (AAN): E accident fatal cu a socede Diadomingo anochi laat net dilanti di salida di Renaissance Mall riba Lloyd G. Smith Boulevard, ta sigui di ta combersacion den pueblo. Un chauffeur femenino hoben di inicial C.F. di apenas 24 aña di edad, a caba di sali for di un establecimento cerca di Linear Park cerca di Plaza Turismo y hopi burachi mes a core bay direccion west.
El a subi e asina yama ‘Brug di Sonesta’ cu asina hopi velocidad, (kizas 100 km/h plus) y ora di baha bek a dal cu impacto severo contra un pareha kendenan ta cruzando pa bay e Mall. Tabatin 2 pareha mas canando 1 meter nan dilanti, y e dos personanan aki a scapa di chiripa. E dama a cay como 20 meter mas dilanti, y e cabayero victima a keda pega riba e hood cu a kibra manera den dos... y te dilanti ex-edificio di Aduana el a cay eybao.
Danki na testigonan, y varios camera di High Definition, a logra haya sa e number di e Jeep Grand Cherokee preto aki, y a bay mesora na un compleho na Bushiri riba e caminda di Bushiri pa Pos Abao, unda a detene e mucha muhe.
Contrario na rumornan cu a core riba Dialuna y tambe Diamars, hecho ta cu e mucha muhe keto bay ta deteni. E no a wordo laga den libertad, y mas bien awe Diaranson 7 di Januari 2025, e lo tin di presenta dilanti Hues Comisario pa asina e dicidi si ta prolonga su detencion of no.
Di awor caba a haya sa cu Ministerio Publico ta pidi pa su aresto wordo prolonga, relaciona cu investigacion cu ta sigui.
Mientras tanto abao riba e caminda na salida di Renaissance Mall, por mira circulonan cu krijt color blauw y tambe color geel cu ta indica unda precisamente impacto a socede, y tambe unda obhetonan a wordo haya benta abao.
Ainda comunidad Dominicano na Aruba ta lamenta perdida di e dos personanan aki. Hopi hende cu ta bishita Casino, conoce e dama Jocely y ta record’e como un persona hopi social, alegre, y semper cu su sonrisa y chistenan.
