ORANJESTAD (AAN): E decision a cay pa no hiba e caso mas dilanti Huez! Ministerio Publico a dicidi recientemente pa cera (seponeer) un caso penal contra un agente policial
cu tabata envolvi den un tiramento caminda un persona a resulta herida. E caso ey a socede riba 10 di maart ultimo.
Tanto e agente policial en cuestion como e victima a worde poni na haltura di e decision aki. Ministerio Publico a informa tambe alto comisario di Polis.
E incidente a sucede durante un persecucion na pia entre dos agente policial y dos persona despues di melding di un kiebro den un edificio na San Nicolas.
Ministerio Publico ta conclui a base di e investigacion di LandsRecherche cu e agente policial en cuestion a saca su arma di servicio di su holster. Mes ora despues e tabata kier a hinca e arma back den e holster. Na momento cu el a hinca e arma back, un tiro a sali cu a dal e victima.
E investigacion no ta inclui ningun indicacion cu e agente policial a los tiro intencionalmente y dirigi riba e victima. Pa e motibo ey e no por worde teni penalmente responsable y e caso a worde seponeer.
