Caso na Santana Central di Sabana Basora
ORANJESTAD (AAN): Kizas tin un motibo cu den luna di Mei, hendenan ta bay comete vandalismo of kizas ladronicia den kelder of grafnan. Pasobra apenas comienzo di luna di Mei na e isla di Curaçao, denuncia a wordo haci na Polis di Willemstad, cu destruccion a ser haci den Santana Catolico di Santa Maria, cu ta keda un tiki panort di Willemstad.
Na Curaçao a bin haya e entrada di kelder kibra, y aki vandalista y/of ladron a saca e defunto for di e caha di morto, laga partinan di e señora defunto benta na suela. E persona a fayece 9 aña pasa.
Caso na Aruba: Pero awor den fin di siman, ta Aruba ta na turno! Un kelder singular di un señora defunto, a wordo haya cu su entrada di concrete destrui. For di paden por a mira cu e tapa di e caha di morto a wordo ranca y saca te awor, y asina e vandalistanan a mishi cu e parti paden.
E caso aki a keda registra na Santana Central di Sabana Basora. E destruccion aki a cay duro pa famia net riba Dia di Mama cu nan a bay cerca su ultimo lugar di sosiego pa haci un oracion.
Kico e vandalistanan lo a bay cune, no ta conoci. Hecho ta cu vandalismo riba un Kelder, ta algo cu hopi hende ta considera di ta un crimen di nivel di mas baho cu ta existi. Ta trata aki di hendenan cu ta bay horta for di graf di un persona cu ya no ta bibo mas pa stop bo. E acto aki ta afecta famianan, y ta laga otro hende keda cu duda si acaso nan ser stima cu ta sosegando nan alma, realmente ta hayando e trankilidad cu nan merece. E por nifica hasta hortamento di flor of krans, of hasta destruccion di graf of kelder. Hasta esnan cu ta destrui esakinan “pa pret”, tin di bay busca yudanza profesional.
