Accidente fatal na Paradera
Chauffeur a bandona sitio di e desgracia!
ORANJESTAD (AAN): Diadomingo marduga rond di 01:10, e Centro di Polis a ricibi notification di un accidente fatal dilanti di Shiribana Bar & Restaurant na Paradera.
Segun informacion preliminar, un auto a dal un señora cu tabata riba un e-bike (step), resultando den un situacion grave.
Central di Polis a yama un patruya cu urgencia. Na yegada di e patruya na sitio, nan a descubri cu e señora tabata riba e caminda sin señal di bida.
Inmediatamente, polis a yama ambulans cu urgencia, pero a pesar di e esfuerzo di e personal di ambulans, lamentablemente no tabatin nada mas cu nan por a haci pa salba e señora.
Dr. Valkuil, forensico na sitio, a constata morto di e victima, Julieth Patricia Patiño Castro, naci na Colombia dia 15 di november 1988. E tabatin 35 aña di edad. E ta bira e di 9 morto den trafico pa loke ta 2024.
Departamento di Trafico a asisti pa cuminsa nan investigacion di e accidente.
Autoridadnan ta haci un apelacion na e chauffeur di e auto cu tabata envolvi den e accidente pa presenta su mes na un di e wardanan di polis of pa tuma contacto cu Central di Polis na nr. 100.
Slachtofferhulp tabata presente na sitio pa duna sosten emocional na famia di e fayecido.
DIARIO y tambe Cuerpo Policial di Aruba ta manda su palabra di condolencia na famia di e fayecido.
