Nan a wordo gara rato despues
- Nan a bay benta 2 smartphone te banda di Scol di Ayo
ORANJESTAD (AAN): Diasabra atardi, un unidad di Polis di Santa Cruz a wordo manda na Boca Mahos pa check eynan un caso di kiebro for di un auto.
Polis a yega den e area, y a bin haya sa cu ta for di 2 auto tabatin ladronicia cometi. En total, articulo cu ta pertenece na 5 turista a wordo horta. Polis a atende cada uno di nan pa tuma denuncia.
E dama turista denunciante di inicial C., a informa Polis cu nan a horta su smartphone, pero e momento ey e ta siguiendo e ‘location’ di su telefon horta, via un app di ‘Find my Phone’. El a indica cu GPS ta localisando su telefon horta e momento ey den cercania di Soeur Juliette School na Ayo. Algun miembro di su famia a dicidi drenta auto pa asina controla e area.
Polis a check cu Central, y asina a dicidi na manda un patruya tambe na Ayo pa haci un control.
Ora di yega Ayo, agentenan a bin topa cu un tas preto, conteniendo algun articulo. Den e tas tabatin 2 smartphone entre e articulonan.
Polis a core notifica Recherche, y team forensico di BFTO pa bay eynan. E articulonan a wordo confisca y hiba Warda di Polis.
E turista a splica Polis, cu nan a mira un Suzuki modelo APV color blanco, y tambe un Chevrolet Aveo color berde menta, ta pasando banda di e autonan for di cual a horta. Esaki a socede alrededor di e ora cu e articulonan a wordo horta.
Mientras cu Polis ta papiando cu e turista, diripiente e persona aki a cuminsa grita. El a grita y mustra Polis pa wak rond. A resulta cu tur dos auto ta pasando e momento ey, esta e Suzuki APV y tambe e Chevrolet Aveo. Cada uno tabatin 2 persona den nan.
Polis di Santa Cruz a reacciona inmediatamente y a stop e dos autonan aki. Ora cu a pidi e personan tras di stuur pa nan rijbewijs, ningun por a mustra esaki. E dos ocupantenan tampoco no tin ningun clase di cedula.
Mesora Polis a consulta cu superiornan, y decision a cay pa hiba tur hende rumbo pa Warda di Polis pa asina cuminsa investigacion, y trata na identifica e cuatro hendenan aki di habla hispano.
Tanto e Suzuki APV y e Chevrolet Aveo a wordo confisca, y hiba na Warda di Polis na Balashi.
Na Warda di Polis na Santa Cruz, a drenta den contacto cu instancia di Guarda Nos Costa pa yuda haya informacion di e cuatro personanan aki. Computer a divulga cu tur cuatro ta indocumenta na Aruba, pero cu 3 di nan a yega di pidi asilo.
A base di esaki, e stranhero di inicial R. a wordo entrega na Guarda Nos Costa. A check cu Fiscal tambe, y a splike di loke a pasa cu e turistanan. El a duna OK na final pa duna e turistanan bek tur e pertenencianan di nan cu a wordo haya.
Pues bo ta mira aki, con cuatro stranhero indocumenta ta core rond riba caminda di Boca Mahos y Natural Bridge, y horta pertenencia di 5 turista. Anto ainda nan kier asilo pa keda Aruba.
