Investigacion di autoridad na Aruba
ORANJESTAD (AAN): Tabata Diadomingo mainta pa 8:44 am, cu yamada a drenta na Central di Polis, caminda personal di The St. Regis Aruba Resort na forma urgente a indica cu un persona a caba di cay for di balcon y e ta benta eybao na suela y no ta duna señal di bida.
Inmediatamente a cuminza manda un patruya di Polis, y na mesun momento a informa Centro di Alarma pa nan despacha un unidad di Ambulance pa e lugar.
E prome unidad di Polis cu a yega, a pasa di biaha pa e area pafo di lobby cerca di zona di piscina, y a bin topa cu un persona masculino benta eybao y e no ta reacciona.
Paramediconan a yega y mesora a bay check e senjalnan vital di e persona, pero e no tabatin nada. Nan a informa Polis pa mihor pone Docter na altura, como cu e persona no ta parce di ta na bida. Mientras tanto personal di e Resort a bisa cu ta trata aki di un turista masculino cu ta hospeda eynan, y e ta di nacionalidad Mericano.
Central di Polis na su turno a notifica tur instancia concerni den casonan asina, incluyendo Recherche, team forensico di BFTO, Docter, y Bureau Slachtofferhulp pa yega eynan.
For di observacionnan, ta mustra cu e turista aki lo a bula for di balcon di un di e pisonan mas halto di e Resort. Polis mientras tanto a seya e zona abao, pa evita cu cualkier hende ta yega cerca.
Mas despues Polis hunto cu personal di e Resort a bay halto pa asina controla e camber di e victima. Pa nan sorpresa den e camber, a bin topa cu un señora cu tampoco no tin señal vital. A laga Paramediconan bay na halto tambe den e camber pa check esey, y no tabata haya pulso ni batimento di curazon mas.
E camber tambe a wordo seya, y Polis a cuminza pensa cu ta trata aki di un acto di asesinato/suicidio. Pues e homber lo a mata su casa, y despues a bula fo’i balcon pa caba cu su mesun bida. Toch tur detaye di esaki tin di wordo investiga. A bin haya sa cu e señora morto, ta casa cu e homber cu a ser haya abao benta.
Bureau Slachtofferhulp a duna yudanza na cualkier otro huesped cu por a mira e homber benta abao, y tambe a duna palabranan pa trankiliza e personal di e Resort.
Vocero di Polis, Liliana Rasmijn a indica cu esaki ta un caso lamentable y inusual, pero e investigacion di parti autoridadnan concerni lo por yuda haya claridad di e asunto. E oficial di Polis no por a duna mas detaye, ni e edad di esnan cu a fayece.
DIARIO hunto cu Cuerpo Policial ta manda palabranan di condolencia na famia di e fayecidonan.
