Liliana Rasmijn PR di Cuerpo Policial:
ORANJESTAD (AAN) Señora Liliana Rasmijn, Vocero di Cuerpo Policial Aruba (KPA), kier a corda tur esnan concerni, cu dia 24 di Mei ta ultimo dia pa entrega arma y/of municion, sin consecuencia.
Rasmijn a señala cu esaki ta algo interinsular, na unda College di Korps Chef a dicidi pa hacie simultaneamente, den mesun temporada.
El a comenta cu Curacao a hacie prome, despues a bin Sint Maarten, a sigui Bonaire, y Aruba a rek un tiki mas, pasobra nos pais a cuminza net un siman despues.
Esaki ta algo cu ta concerni na cada Korps Chef di e islanan, na unda nan a dicidi conhuntamente cu nan ta bay haci algo, unda envez di un pais so ta target, ta target completamente.
“ Cada un a uza nan diferente experticia, nan diferente manera pa campaña, pa purba di promove pa haya mas arma ilegal pa wordo poni den baki. Na Aruba nos tin e baki 2-baki blauw. Nos a cuminza na San Nicolas prome, na unda nos a haci despues esun di Playa na Wilhelminastraat limpi, y door di esey a prolonga e temporada aki pa duna chens tambe na esnan cu ta pabao di brug” Liliana Rasmijn, PR di KPA a splica.
El a agrega cu te cu awe ta tres arma, diferente municion, pero dia 24 di Mei ta ultimo fecha cu tin pa bo entrega e arma, deposit’e den e baki blauw, e ta anonimo.
“Corda bon, ora e arma ta yega na nos, e ta bay wordo destrui. E no ta bay wordo investiga ni nada. Kiermen, djis trece”, Liliana Rasmijn a indica.
El a agrega cu Polis ta haya tips cu ta drenta na unda nan ta yega na e personanan cu tin e arma di candela ilegal, anto eynan si no ta aplica cu bo no ta haya castigo. “Eynan bo ta wak cu nos tin cinco persona cu a wordo sentencia caba, a bay via e señal recht, cu ta algo cu Aruba tin, cu den menos di un siman e persona ta bay dilanti Huez, y Huez ta dicta di biaha”, Vocero Policial a remarca.
{gallery}Corda cu dia 24 di Mei ta ultimo dia pa entrega arma y of municion, sin consecuencia{/gallery}
