Su number a hunga despues di 27 dia....
*E ta un Colombiano di 36 aña
ORANJESTAD (AAN): Cuerpo Policial cu su oficialnan a keda investiga y a canta bingo riba Diabierna mainta.
Despues di 27 dia, nan a logra di actua y a detene un persona den e caso fatal di Hit & Run cu a socede Diasabra dia 27 di December 2025 banda di 8’or di anochi riba e caminda di Pos Abao pa Bubali, unda dos dama turista a keda gravemente herida banda di caminda.
Manera ta conoci, ambos a haya golpi severo na cabez y e dama Lisa Marie Barnett di 57 aña a fayece despues di tabata interna den Intensive Care Unit.
Awor a drenta informacion cu Diabierna mainta, 23 di Januari 2025, den oranan di mainta Polis di Trafico a detene un persona den e caso di Hit and Run aki. Su number a hunga despues di 27 dia.
Vocero di Polis, Liliana Rasmijn a confirma cu e detenido ta e homber di fam D.P. di 36 aña di edad naci na Colombia.
For di comienso caba, DIARIO tabata publica cu testigonan a bisa cu nan a mira con e Pickup color preto a sigui core, y no a ni sikiera primi tiki brake of stop pa baha wak ta con el a laga e hendenan herida atras.
Vocero di Polis no a duna informacion si acaso a logra haya e vehiculo, y tampoco no a duna informacion si ta trata aki di un Pickup of algo otro.
Hecho si ta cu a keda demostra, cu Cuerpo Policial ta keda traha incansabelmente pa resolve tur caso cu presenta.
E victima: E victima fatal ta Lisa Marie Barnett naci na Merca dia 26 di October 1968. El a keda hopi critico den Intensive Care Unit cu un herida cerebral traumatico, nuebe ribchi kibra, y un pulmon a colapse. El a fayece debi na e heridanan ricibi.
Su yiu muhe Michelle Rodriguez a start un GoFundMe pa recauda fondo pa por hiba e mama pa Merca. Meta tabata pa yega na 40 mil Dollar, pero el a fayece prome cu e campaña a finaliza. Riba e potret aki por mira e victima cu a fayece, y tambe por mira tur dos turista benta abao riba caminda na Pos Abao.
Te cu Diabierna atardi, a ripara cu e GoFundMe a recauda $26.389 pa e famia.
Pa awor e homber ta keda deteni pa interogacionnan cu lo sigui, y ta spera cu pronto lo haya mas detaye di sea Polis of di Ministerio Publico.
