Segun Francel Bernardus -Vice president di Sindicato SPA:
ORANJESTAD (AAN): Segun Francel Bernardus -Vice president di Sindicato SPA, Polis no ta baha tolerancia pero ta actua constantemente den trafico cu man duro y ta parti hopi boet na esnan cu ta kibra regla den trafico y core iresponsabel. Sinembargo e ta bisa den un entrevista recien cu DIARIO, apesar cu polis tin control activo riba nos careteranan, tin mester mas polis riba caya pa haci e accion di polis mas visibel.
El a menciona cu uzo di smartphone ainda ta un problema. Hopi automobilista ta uza nan cellular mientras nan ta stuur y ta causa accidentenan chikito pero tambe hopi biaha grandi. Esaki, segun señor Bernardus, e ta ripara hopi ora cu e ta maneha su vehiculo personal, hopi hende ta na smartphone mientras ta stuur auto, pero ora e ta den auto di polis, e no ta wak esaki mucho, pasobra chauffeurnan ta hopi atento pa polis y ta baha nan smartphone momento cu nan wak polis.
Un solucion cu e ta wak den esaki, pa polis cuminsa uza auto particulier pa haci control di uzo di smartphone den trafico. Y tambe e ta di opinion cu mester subi e suma di boet pa uzo di cellular, sea pa yamada of pa simplemente tene cellular den man mientras cu ta stuur .
Loke tambe lo yuda, segun señor Bernardus, ta sistema di tecnologia, cu ta trahando bon na Hulanda y otro paisnan, entre otro camara, na unda un persona ta haya boet directamente na cas pa entre otro velocidad halto. El a menciona cu tin mas proyecto na caminda, entre otro drones, pa yuda cu e control di trafico y haci’e mas eficiente.
“Nos ta bayendo riba e bon caminda. Sinembargo, personalmente mi ta kere cu e castigonan y boet mester subi, pasobra si e no subi, esnan cu ta kibra ley di trafico, y tin placa pa paga boet, nan lo sigui haci mesun cos despues”, señor Bernardus a expresa.
