Eddy Rincon a perde su bida
- Victima a duna Polis tur informacion prome cu el a fayece
- Asesino Shannon Williams a keda deteni poco despues
ORANJESTAD (AAN): Un caso hopi serio a presenta su mes Diaranson anochi cerca di e tanki di WEB Aruba NV cu ta riba Sero Alejandro cu ta keda net panort di Savaneta.
E anochi tabata uno trankil, como cu awacero no tabata cay. Sinembargo e habitantenan cu ta biba como 440 meter abao di e Sero, a tende tironan fuerte sona. Tabata bisto cu e tironan aki ta bin for di e area rond di e Tanki.
Poco despues un auto a mobiliza cu velocidad halto baha bay di e sero, y nan a cuminza tende con tin gritonan fuerte. E gritonan aki tambe ta bin procedente di e top di Sero Alejandro.
Bisiñanan mes a drenta nan auto y a bay tira un bista na halto rond di e Tanki. Aki nan a bin topa cu un hoben ta gritando di dolor, y e ta sangrando. E hoben ainda na tino a indica cu el a haya impacto di bala.
Mesora bisiñanan a yama Central di Polis, y e yamada aki a drenta pa 8:08 pm. E prome informe ta cu tin un homber herida cu bala, y mesora unidad di Polis como tambe Ambulans a ser manda pa Sero Alejandro.
Diferente unidad di Polis di San Nicolas a ser manda na e lugar, y e prome unidad cu a yega eynan, a bin topa un hoben basta herida, sclamando di dolor. Ora cu Polis a puntre kico a pasa, e hoben a cuminza suministra e agentenan cu informacion valioso.
Victima a declara tur cos: Di e forma ey, e victima a indica cu e anochi ey el a wordo secuestra prome! El a splica cu tres hende den un auto sedan modelo Toyota Mark X color blanco cu stuurwiel na banda drechi, a pushe forzosamente den e auto. Nan a hibe te banda di e tanki riba Sero Alejandro. El a sigui splica Polis kico a pasa, y cu na final e chauffeur di e auto a mik arma riba dje y a los tiro.
Aki ta unda cu e victima a haya chens di bula for di e auto, pa sali di e situacion peligroso aki. E auto e ora a djis sali bay lagand’e eyriba cu tur dolor, mientras e tabata sangrando profusamente.
E victima a duna Polis detayadamente nomber di e chauffeur di e Toyota Mark X cu a tira riba dje, y a splica cu den e auto tin un muher tambe, y tin un homber di origen Asiatico sinta. Polis a tuma tur detaye, y a cuminza nota cu e victima a cuminza bay den shock. Esey ta debi cu e ta perdiendo hopi sanger posiblemente internamente.
Paramediconan a mira e seriedad di e victima, y aunke nan a trata na stabiliza su curpa eynan, na final a opta pa bay cune lo mas rapido posible pa Servicio di Emergencia na Dr. Horacio Oduber Hospital pasobra su situacion ta hopi critico.
Mientras tanto Polis a duna Recherche di San Nicolas tur detaye di loke e victima a declara. E lugar mes a wordo completamente seya, y a manda busca personal forensico di BFTO pa documenta tur e zona di crimen.
Detencion di e tirado: Polisnan hunto cu Recherche a dicidi cu ta actua rapido. Pasobra tur cos ta mustra cu e homber Shannon Williams di e Toyota Mark X ta e autor di e crimen. Na un forma tactico a yega mesora na su cas na Mabon, den cercania di Scol SPO. Vocero policial a splica cu e Polis y Recherche a ehecuta e detencion aki na un forma tactico.
El a wordo hiba Warda di Polis na San Nicolas, unda Fiscal Auxiliar a duna ordo pa e keda deteni mesora. E homber Shannon Williams pues lo no goza nada di Pasco y Aña Nobo pa e proximo añanan su dilanti.
Un rato despues cu e aresto a socede, e lamentable noticia a drenta for di Hospital, cu pa 9:07 pm, Dr. Duyzer a constata morto di e victima. El a wordo identifica como Eddy Rincon Bravo, naci dia 11 Juni 2003 (19 aña) na Colombia. El a sucumbi di e heridanan di bala.
Esaki automaticamente ta cambia e spectrum di seriedad di e caso. Recherche ta trahando awor pa bay pone man riba e muher, y tambe e homber Asiatico (kende ta biba den area di Pos Abao) cu tabata den e auto tambe ora cu e secuestro a socede, y a desemboca den un asesinato riba Sero Alejandro. Testigonan a bisa cu nan a mira e homber Asiatico aki bishita e victima Eddy Bravo na varios ocasion na Hospital, debi cu el a haya accident di trafico y tabata hospitaliza. Hendenan a mira e homber Asiatico hunto cu un muher tambe bishitando Bravo na Hospital. No ta conoci si acaso e dosnan aki mira na Hospital par di dia pasa, ta esnan envolvi den e asesinato.
Vocero Liliana Rasmijn di Cuerpo Policial, a bisa cu e caso di Diaranzon anochi a bira e di 2ndo asesinato pa 2022 na Aruba. E prome caso tabata e asesinato violento y cruel di e ciudadano Angela y cu a ser laga atras morto dilanti Santana na Zeewijk.
Na famianan di Eddy Bravo, DIARIO y Cuerpo Policial ta extende e mas profundo palabra di condolencia.
