ORANJESTAD (AAN) Recien caba DIARIO a publica di un caso serio cu a socede Diabierna 11 di Februari 2022 net patras di Flor de Oriente na Playa,
unda un ciudadano a wordo brutalmente atraca, unda hasta por poco el a bay for di tino.
El a bira victima di un homber cu cabey rasta, kende tabata den compania di dos otro homber. E atraco a bira uno violento, y Polis a tuma nota di e caso aki.
Pero awor a bin haya sa cu un otro atraco a socede Diasabra tambe, e biaha aki na e cruzada di Koningstraat y Avenida Alo Tromp.
Tabata Diamars cu e ciudadano di inicial O. a presenta na Warda di Polis na Playa, pa denuncia cu tres dia pasa el a bira victima di atraco na man di dos homber.
E no ta corda cuant’or tabatin e momento ey, pero si cu esaki a socede den oranan di anochi na e cruzada menciona.
El a bisa cu dos homber cu cabey rasta, a dal e masha duro mes. Na final di e atraco violento aki, nan a bay cu su Smartphone y lage atras.
Ta trata di un Smartphone color preto di marca Samsung, pero e ciudadano no ta corda ta ki modelo esaki ta.
Polis a tuma detaye di e caso aki, y a notifica Central di Polis.
