Ministerio Publico a apela sentencia di ex-agente policial
ORANJESTAD (AAN): Ministerio Publico ta interogando e sospechosonan liga den e caso di scuchamento di Tetra-Radio di Polis, caminda e ex-agente di Polis, Vos, a worde condena. Investigacion haci ta mustra cu ainda tin 5 sospechoso. Ta trata aki di Andrade, Koolman, Lacle, Giel y Ponson.
Sospechosonan interoga: Ta asina cu Ministerio Publico a anuncia cu tin 5 sospechoso den caso Vos.
A sali na cla cu tabatin interogacion di e 5 sospechosonan. Por a compronde cu a bolbe yama e sospechosonan pa interogacion.
Lo bay start caso penal: Tin indicacionnan cu e motibo cu Ministerio Publico a laga interoga e 5 sospechosonan un biaha mas na Hues Comisario, ta cu tin pensa dentro di poco cuminsa cu un caso penal. Parce cu ainda e citacionnan pa e caso penal no a sali pero cu e intension ta pa e aña aki ainda e caso worde trata den Corte den Promer Instancia.
Dia 8 December 2023 tabatin e caso penal cu Ministerio Publico a cuminsa contra Vos, kende a worde defendi door di abogado mr. de Sousa.
Fiscal a bisa Hues cu tin 6 acusacion contra Vos: (*) Entre Maart 2018 y 2023, Vos a malversa radionan di Polis. (*) A horta Tetra-Radionan di Polis. (*) A viola secreto di trabao door di facilita informacion na cierto media y instala aparatonan na su cas. (*) A abusa di su funcion como Polis. (*) A laga su mes worde cumpra. (*) A forma parti di un organizacion criminal.
Fiscal a mustra cu desde 2018, tres di e Tetra-radionan tabata na Vos como Polis di Bario. Investigacion a mustra cu Vos tabata suministra informacion na Lacle, Giel y Andrade.
Asina a haci investigacion na cas di Vos y a haya tres Computer Laptop instala y conecta cu waya di audio riba Tetra-radio ricibiendo señal na Polis canal 1, cu ta e canal general di Polis.
Tabata usa e software di Zello Walkie Talkie, pa asina manda informacion na cierto media. Ta asina cu 2 di e Computer laptops a worde desactiva di distancia pa daña investigacion. Pero investigadornan a logra habri un Computer laptop caminda a haya 9.572 informacion di Polis manda pa cierto media. A haya un di Mi-Fi tambe cu SIM-Card conecta pa 24 ora.
Fiscal a bisa cu e ta haya Vos culpabel di tur e acusacionnan, y a exigi 36 luna di prison (3 aña) di cual 8 luna ta condicional cu un tempo di prueba di 3 aña. Fiscal a exigi tambe cu pa 5 aña, Vos no por eherce e trabao di Polis.
Vos laga liber: Hues a bisa cu e no ta haya legalmente proba cu Vos ta forma parti di un organizacion criminal y a declar’e liber di e acusacion ey. Hues ta haya Vos culpabel di e otro acusacionnan. Hues a condena Vos na 16 luna di prison, di cual 8 luna ta condicional cu un tempo di prueba di 3 aña. Hues a bisa cu e ta prohibi Vos di traha como Polis pa un periodo di 3 aña.
E decision aki a haci cu 8 December 2023, Vos a haya su libertad.
Apela sentencia: Ministerio Publico no a keda contento cu e sentencia y a apela. Esey ta nifica cu caso Vos awor lo bay worde trata pa Corte Superior, caminda 3 Hues cu ta forma Hof lo bay trata e caso.
