ORANJESTAD (AAN): Hues di Corte den Promer Instancia a confirma e exigencia di Fiscal pa e homber E.M., kende ta wordo haya culpable di a uza arma di aire pa forza un hende duna placa.
Hues a condena E.M. na 18 luna di prison di cual 6 luna ta condicional.
E sentencia a tuma lugar via video conference, caminda E.M. tabata den un oficina na KIA, mientras cu den sala di Corte di Husticia, Hues, Fiscal, traductor y abogado tabata presente. Via mike, e traductor tabata traduci loke Hues tabata bisa pa e acusado.
SENTENCIA
Hues a bisa cu e ta haya E.M. culpable di tabatin dos arma di aire cu cualnan, hunto cu un otro, a forza e hende pa duna placa.
Pa cu e castigo, Hues a bisa cu e ta tene cuenta cu e rapport di psikiatra cu ta mustra cu E.M. ta adicto na trankilisantenan. Psikiatra ta haya cu door di e adiccion aki, E.M. no ta responsabel pa loke el a haci.
Hues a bisa cu e ta confirma e exigencia di Fiscal y a condena E.M. na 18 luna di prison, di cual 6 luna ta condicional cu un tempo di prueba di 2 aña. Esey ta nifica cu E.M. lo mester sinta castigo di 1 aña di prison y ora e sali e ta cay bou guia di Reclasering.
ARMA DI AIRE TA CASTIGABEL
Loke ta interesante den e caso aki ta cu e acusado a uza dos arma di aire pa forza un hende duna placa. Segun ley, ta castigabel ora ta uza un arma di aire pa menaza, forza un hende. Awendia tin hopi arma di aire, cu ta parce un arma di candela. Den situacionnan di atraco, asalto, menaza of forza un hende, e victima no ta bay fiha si e arma ta di aire of ta un real.
Den tur e susto cu e ta aden y e bruto cu esnan cu ta haciendo e malo, e unico cos cu e victima ta pensa, pa e no wordo tira. Den e caso aki ta mira bon cla con Corte di Husticia a castiga un acusado pasobra ta net arma di aire a wordo uza . Ademas, arma di aire por causa heridanan severo na un persona.
