Fiscal ta remarca den caso di posesion di arma
ORANJESTAD (AAN): E homber Q.R. a scucha Fiscal exigi 2 aña y 6 luna di prison en total pa posesion di arma di candela cu balanan. Ta asina cu Q.R. a admiti y Hues a conden’e na en total 2 aña di prison.
ACUSACION
E acusacion cu Fiscal a presenta den Corte contra Q.R. ta cu riba 17 Februari 2022 e tabatin un arma di candela 9 mm y balanan.
EHECUTA CASTIGO CONDICIONAL
Banda di e acusacion, Fiscal a exigi pa ehecuta e 6 luna di prison condicional cu Q.R. tin. Esaki pasobra el a bolbe cay sera pa posecion di arma di candela den su tempo di prueba.
PISTOOL CARGA CU BALA HAYA DEN AUTO
Riba 17 Februari 2022, Polis a ripara cu Q.R. a core mas duro ora el a mira Polis. Polis a sigui su tras y a par’e na un cas y a pidi Q.R. pa rijbewijs. E agentenan a haya holor di marihuana. E momento ey Q.R. a core bay na pia. Nan a sigui su tras y a detene despues. E agentenan di Polis a bay haci un investigacion den e auto y a haya un tas cu un pistool.
Hues a puntra Q.R. pakico e ta cana arma. Segun Q.R. e ta cana arma pasobra un tal L. a menace. El a bisa cu desde 21 December 2021 e ta canando arma. Segun Q.R., dos biaha L. a saca arma p’e.
CASTIGA CABA PA ARMA
Hues a mustra cu Q.R. a yega di wordo sera caba pa posecion di arma di candela. Dia 11 Juni 2021, el a wordo condena na 11 luna di prison di cual 6 luna ta condicional cu 3 aña di tempo di prueba. Den e tempo prueba, Q.R. ta bolbe cay sera pa arma.
WILD WILD WEST NA ARUBA
Fiscal a bisa Hues cu e ta haya legalmente proba cu Q.R. tabatin un arma cu 9 bala y esaki tabata cla pa tira. E ta un hecho castigabel. Na opinion di Fiscal, posesion di arma ta hopi serio. El a bisa cu un pistool por costa bida di un hende. E hecho cu e arma tabata carga cla pa tira, ta haci e caso hopi serio. Fiscal a bisa cu e sospechoso Q.R. ta bisa cu e tabata cana arma pasobra e tabata sinti su mes amenaza. Na opinion di Fiscal, arma ta crea sentimento di inseguridad den comunidad.
Fiscal a remarca cu ultimo tempo ta manera un Wild Wild West na Aruba. Hopi caso di tiramento. Esaki por afecta nos turismo.
EXIGI CASTIGO
Fiscal a bisa cu segun maneho di Ministerio Publico, pa un residivista ta exigi 2 aña di prison. El a mustra cu den menos cu 6 luna cu Q.R. a sali liber, el a bolbe cay sera pa arma. Fiscal ta haya cu Q.R. no a haya un chens realistico pa haya guia di Reclasering. Esey ta haci cu Fiscal a dicidi di duna Q.R. e di dos y ultimo chens. El a exigi 2 aña di prison di cual 6 luna ta condicional cu un tempo di prueba di 3 aña. E tempo di prueba, Q.R. lo cay bou guia di Reclasering.
Fiscal a exigi pa saca e arma for di circulacion. Tambe el a exigi pa ehecuta e 6 luna condicional cu tabata colga riba cabez di Q.R. pa e promer caso di posesion di arma.
En total e castigo ta bira 2 aña y 6 luna di prison.
ABOGADO
Abogado mr. Mohamed a bisa Hues cu Q.R. a siña su les y awor kier bay Hulanda cu su yiu. E abogado ta haya cu si Fiscal kier duna di dos chens, 18 luna di prison di cual 6 luna ta condicional ta mas na su lugar.
SENTENCIA
Hues a sera tratamento di e caso y a dicta sentencia di biaha. E ta haya legalmente proba cu Q.R. tabatin un arma di candela carga cu bala. Hues a bisa cu Corte no kier pa hende ta cana arma. Corte tin su puntonan di orientacion. Normal pa promer biaha ta condena un persona na 18 luna di prison di cual 6 luna ta condicional cu un tempo di prueba.
Hues a bisa cu e tambe kier duna Q.R. un ultimo chens. El a condena Q.R. na 18 luna di prison di cual 6 luna ta condicional cu un tempo di prueba. Ariba dje ta bin e 6 luna condicional pa e sentencia anterior. Esey ta nifica cu en total e castigo ta 2 aña di prison. Hues a ordena pa destrui e arma y e balanan.
