El a worde libera riba Diabierna
ORANJESTAD (AAN): Biaha pasa ora cu Huez Comisario a nenga di prolonga detencion di ex-Ministro Otmar Oduber relaciona cu investigacion rond di Caso Flamingo, Ministerio Publico mesora a apela e decision ey. Esaki a ser haci debi cu Fiscal no tabata cla cu interogacion ainda.
Tabata Diabierna 10 di Juni 2022 ora Corte Superior via Video Conference a atende un apelacion di Ministerio Publico di Aruba contra e decision di Huez Comisario, cu a dicidi pa duna e sospechoso Otmar Oduber di Caso Flamingo, back den libertad.
Manera ta conoci, tabata luna pasa riba Diamars 10 di Mei 2022, cu LandsRecherche a detene e ex-Ministro, y ex-lider di Partido POR, Otmar Oduber den cuadro di investigacion di Caso Flamingo.
Sinembargo aunke nan dossier di investigacion ta mustra cu tin ainda varios aspecto pa sigui cu e interogacion, Huez Comisario sorprendentemente riba Diabierna 20 di Mei 2022 a duna OK pa laga Oduber den libertad. Ministerio Publico a opina cu esaki ta stroba nan investigacion.
Pesey Corte Superior a trata e siman aki e apelacion di Ministerio Publico contra decision di huez-comisario tocante detencion di e sospechoso. Ministerio Publico a apela e decision aki dia 24 di Mei 2022, esta cu Huez Comisario pa nenga detencion di e sospechoso en cuestion.
Decision di Corte Superior riba 10 di Juni a pone cu Otmar Oduber a entrega su mes pa asina sigui cu e proceso di investigacion den e caso di malversacion como minister.
Den e dos simannan aki, el a pasa den varios sesion di interogacion, cada biaha presenta cu mas prueba su dilanti. E biaha aki si Huez Comisario a hasta prolonga su detencion te cu Diadomingo 26 di Juni 2022.
Sinembargo riba Diabierna 24 di Juni 2022, Fiscal a haya cu el a keda cla cu tur interogacion. Pues di su banda, e ta OK pa Otmar Oduber a bay cas.
“E sospechoso den e investigacion Flamingo a worde manda cas awe riba ordo di fiscal di husticia,” ta loke un boletin di Ministerio Publico ta indica.
Su detencion no tabata necesario mas relaciona cu e investigacion cu tin andando, segun fiscal di husticia.
Toch den mesun rosea, Ministerio Publico a finaliza ta indicando: “E investigacion Flamingo ta canando ainda y señor O. ta sigui como sospechoso.”
