ORANJESTAD (AAN): E hobennan homber C.N.(19) y E.W.(21) a scucha Fiscal exigi 3 y 4 aña di prison pa e asalto arma cu nan a haci. Den e caso di E.W. tin dos caso y esey a haci cu Fiscal a exigi 4 aña di prison.
E acusacion cu Fiscal a presenta contra C.N. y E.W. ta cu dia 29 September 2021, nan a haci un asalto arma. E.W. ta wordo acusa di atraco cu violencia di un suma di placa riba 16 November 2020. A bay cu 1000 florin. Tambe Fiscal ta acusa E.W. di posesion di arma di candela riba e mesun dia ey.
ASALTO ARMA
Hues a puntra C.N. y E.W. si a haci asalto arma. Nan a haci uso di arma falso. C.N. a bisa Hues cu no tabata su intension. E tabatin algun debe y pesey a haci’e pa haya placa. El a bisa cu un ora promer a planea e asalto arma. El a bisa cu e debe 500 florin cual el a presta. El a bisa cu nan dos a bay na Brazil Food Center y a haci asalto arma. Hues a bisa cu nan a bay cu 600 florin y 200 dollar. C.N. a bisa cu E.W. a bin cu e armanan falso. Hues a remarca cu esaki ta un asunto hopi serio. C.N. a bisa Hues sorry. Hues a mustra cu pa delito asina tin castigo pisa. E.W. a admiti di a bay cu e armanan falso pa usa durante e asalto.
El a bisa cu el a haci e asalto arma pasobra e tabata kier placa pa cumpra cosnan pa cas. El a bisa cu tabata den tempo di Covid y no tabatin entrada. E.W. a bisa cu e ta sorry cu esaki a pasa. Hues a remarca cu 16 November 2020 hunto cu 2 otro persona, E.W. a haci un otro asalto. El a bisa cu e dia ey el a haci aña y nan a bin buske pa sali. Nan a bin cu e plan pa haci e asalto na un supermercado Chines.
Segun E.W. el a nenga di haci’e pero nan a insisti cu e mester yuda nan. Eynan tambe el a usa arma falso. Ta e mesun arma cu el a usa na e promer asalto. Hues a puntra E.W. pakico e tin arma. Segun E.W., e tin problema cu gang di Pos Chiquito y nan a purba tir’e mata. Pesey el a busca un arma falso pa spanta nan pa nan stop.
RECLASSERING
Reclassering a traha un raport cu ta mustra cu C.N. no a caba Avond Mavo. Famia a separa y nan ta den situacion financiero dificil. Tambe C.N. tabata huma marihuana. Reclassering ta pidi castigo condicional cu guia di Reclassering. C.N. a bisa cu e ta di acuerdo.
Pa loke ta E.W. tin un raport di Reclassering y di psicologo. Nan ta conclui cu E.W. no a caba school y cu E.W. ta pensa negativo riba su mes. Psicologo ta mustra cu E.W. por wordo influencia hopi facil. E tabatin pensamento di mata su mes. E ta depresivo y ta adicto na marihuana. E.W. a bisa cu e kier ayudo.
FISCAL
Fiscal a bisa cu e ta haya legalmente proba cu e duo aki a haci asalto arma 29 September 2021 na Brazil Food Center y bay cu 928 florin den dia cla. Polis a bay mira video di seguridad y door di nan keds a reconoce nan. A haya e placa y debolbe esaki. Polis a reconoce e arma cu E.W. a usa den un otro asalto na Monserat caminda a bay cu 1000 florin. Net dia cu E.W. a haci aña y a bay cu otronan haci asalto arma.
Na opinion di Fiscal, e hecho cu a usa arma falso, no ta haci diferencia den seriedad di e caso. Door di a usa arma, cu despues a resulta di ta falso, a causa trauma na e personanan cu ta traha duro pa gana placa. Fiscal a remarca cu pa asalto arma ta baha pisa. Den e caso di e duo aki, Fiscal a tene cuenta cu ta promer biaha cu nan ta cay sera y cu Reclassering a mustra cu nan mester di guia durante un periodo largo pa evita cu nan ta bolbe haci mesun cos. E.W. segun raport di psicologo, tin hopi problema cu mester traha riba dje. Fiscal a bisa cu na Aruba no kier asalto arma. El a remarca cu E.W. tin dos asalto arma y por exigi castigo mas pisa. Fiscal a bisa cu e kier pa E.W. haya guia y si bay pidi castigo halto, esey no por ta posibel. E ta haya cu mester duna E.W. y N.C. un chens. Fiscal a exigi pa C.N. 3 aña di prison di cual 1 aña ta condicional cu 3 aña di prueba. Esaki bou guia di Reclassering. Pa E.W. cu tin 2 asalto, Fiscal a exigi 4 aña di prison di cual 1 aña ta condicional cu 3 aña di prueba. E periodo di prueba E.W. ta cay bou guia di Reclassering. Fiscal ta haya e demanda di daño na e supermercado di 1000 florin, mester wordo paga. E 928 florin cu a keda confisca tambe mester debolbe.
ABOGADO
Mr. Kock a bisa Hues cu tanto C.N. y E.W. a admiti. El a mustra cu Reclassering ta pidi castigo condicional pa tempo largo pa yuda C.N. E abogado a mustra cu tin sentencia den caso di asalto arma pa first offender, 9 luna di prison di cual 3 luna ta condicional. E abogado a sigui bisa cu C.N. kier cambia. E kier bira un empresario. E kier haya ayudo.
Den KIA el a sigui Yoga y les di lasser. E abogado ta kere cu lo ta bon pa pone C.N. riba e bon caminda y no asina largo den KIA. El a pidi Hues pa duna castigo pa mas pronto posibel C.N. por sali. Por ta pone dos luna mas riba e 7 luna cu e ta sera den KIA cu 3 aña di prueba bao guia di Reclassering.
Pa loke ta E.W., e abogado a bisa cu psicologo ta haya cu e tin basa problema. E tin problema pa compronde cosnan. E abogado ta haya cu e castigo exigi pa Fiscal ta mucho halto. El a bisa Hues cu si bay lag’e sera asina hopi pa despues e haya guia di psicologo, ta laga mucho tempo pasa. E hecho cu E.W. tin pensamento di mata su mes, ta haci e asunto hopi preocupante. El a purba haci’e caba den KIA. E abogado ta haya cu E.W. no ta compronde kico e ta haci. E problema di tiramento di gang di Pos Chiquito ta afecta E.W. hopi. El a mustra cu psicologo ta haya cu E.W. ta pensa manera un mucha di 11 aña.
