E acusado ta para riba cu e no sa di nada
ORANJESTAD (AAN): E homber Arubiano M.K. di 64 aña biba na Hulanda, apesar di a para riba di no sa di nada, a worde condena na 3 aña di prison pa a exporta 5 kilo di cocaina scondi den un rolstoel electrico.
Exporta cocaina: Tabata dia 7 September 2023, miembronan di Douane a detene M.K., ora cu e cacho anti droga a reacciona riba e rolstoel electrico cu M.K. tabata sinta ariba. A resulta cu den e rolstoel electrico tabatin 5 kilo di cocaina scondi. M.K. tabata cla pa bay back Hulanda.
Den Corte M.K. a bisa Hues cu e tabata usa un rolstoel electrico door cu e tin problema cu lomba. El a splica cu e por cana pero ora e cuminsa haya dolor of ora e tin cu cara y para hopi, e ta usa e rolstoel electrico.
Acusado ta nenga di sa di e droga: El a splica Hues cu el a haya e rolstoel electrico for un instancia na Hulanda pa usa. El a desmenti categoricamente cu el a trafica cocaina. El a bisa Hues cu e no sa mes cu tabatin cocaina. Hues a mustra cu Douane Recherche a usa cacho anti droga y a bin haya 7 paki di cocaina scondi den e rolstoel cu ta pisa 5 kilo. M.K. a bisa Hues cu e no tin idea mes con e droga tabata den e rolstoel electrico.
Hues a bisa cu e agentenan di narcotica a papia cu e chofer di taxi cu a hiba M.K. aeropuerto. E chofer a declara cu el a bay busca M.K. na un hotel den Playa. Segun e chofer, e mester a warda te ora un pick up blanco a trece e rolstoel electrico.
Segun M.K. a bisa Hues awor, e Taxista a bisa cos cu no ta asina. El a bisa Hues cu e rolstoel electrico tabata para ey banda mes y e chofer di taxi a yud’e dobla e stoel y hink’e den e taxi.
Hues a mustra cu Polis a check e smartphone di M.K. Tin diferente yamada for di Hulanda y Polis ta sospecha cu un persona cu ta usa e number “lider” a prepara henter e transporte di cocaina. Segun M.K. su smartphone no tin nada di haci cu e caso. E ta haya cu esaki ta speculacion di Polis. Hues a mustra cu M.K. tin carchi di castigo na Hulanda y pais Francia cu casonan di droga.
Fiscal a exigi 42 luna di prison: Fiscal a bisa cu a haya 5 kilo di cocaina den e rolstoel electronico. Na opinion di Fiscal, un pasahero ta responsabel pa loke e ta hiba. El a bisa cu M.K. ta desmenti di sa di droga. Pero e tin sentencia pa droga na Hulanda y Francia. Tin imagennan cu ta mustra cu M.K. por cana bon. E no tin relato di dokter cu ta mustra cu e tin problema cu lomba. E ta bisa cu el a haya e rolstoel electrico for di un instancia na Hulanda. Fiscal a sigui bisa cu e Taxista a bisa cu na e hotel e mester a keda warda pa te ora cu un Pickup a yega pa trece e rolstoel electrico.
Fiscal ta haya M.K. un residivista di droga y a exigi 42 luna di prison. Fiscal a exigi tambe pa e rolstoel electrico y e smartphone di M.K. keda confisca. Fiscal ta haya cu for di e smartphone por conclui cu tabatin combersacion riba droga.
Defensa di abogado: Abogado mr. Emerencia a bisa Hues cu M.K. ta para riba cu e no a transporta droga. Na opinion di e aboghado, M.K. ta consistente cu e no sa con e droga a yega den su rolstoel electronico. E abogado a bisa cu Fiscal ta bisa cu M.K. ta responsabel pa loke e ta viaha cun’e. Segun e abogado, M.K. no tabatin bista constante riba su rolstoel electrico tur ora durante su estadia na Aruba.
M.K. no ta contento cu e forma con el a worde trata. E abogado a bisa Hues cu M.K. ta mustra agresivo pero no ta asina. E tin problema na lomba y ora e sinti dolor e ta usa e rolstoel electrico. Segun e abogado, hopi biaha M.K. tabata cana y e rolstoel electrico ta keda para. E abogado a bisa Hues cu por bien ta cu tabatin un plan pa pone e droga den e rolstoel electrico y ora e yega na Hulanda, e ta worde saca promer cu e rolstoel electrico yega den man di M.K.
E abogado a bisa Hues cu M.K. no por duna splicacion pasobra e no sa di nada di droga. E abogado ta haya cu e rolstoel electronico y e cellular mester debolbe na M.K. El a remarca cu Fiscal kier conclui cu lo tin combersacion di droga pero no tin prueba.
Sentencia: Hues a sera tratamento di e caso y a pospone e caso pa bay pensa riba un sentencia. Despues di rato Hues a presenta y a dicta sentencia di biaha. Hues ta haya legalmente proba cu M.K. a transporta droga. Hues a mustra cu e chofer di taxi a bisa cu mester a warda pa un vehiculo Pickup trece un rolstoel electrico. Hues a bisa cu e no ta kere M.K., cu “M.K. no sa di nada”. Hues a bisa cu e no ta kere cu un hende ta bay hinca droga den un rolstoel electrico sin sa na unda esaki ta bay.
Castigo: Na opinion di Hues, mirando M.K. su carchi di castigo, por pensa cu e a purba hiba droga Hulanda. Hues ta comparti punto di bista di Fiscal cu tur pasahero ta responsabel pa su cosnan cu e ta viaha cun’e.
Hues ta haya M.K. un residivista di droga. Hues a condena M.K. na 36 luna di prison, kitando e tempo cu e ta sera den KIA. Hues a bisa cu e rolstoel electrico ta keda confisca pero mester debolbe e smartphone.
