American Express a haya hit di 184 mil Dollar
ORANJESTAD (AAN): E homber Dominicano G.H. di 44 aña, biba y trahando den sector hotelero na Aruba, sospechoso di “skimming” (copia credit cards) a scucha Fiscal exigi 3 aña di prison p’e. Cu su smartphone e tabata saca potret di credit cards na e Restaurant unda e tabata traha den un hotel y ta manda esakinan pa un tal Alex y Diego. American Express a haci denuncia na Polis di Aruba cu nan a worde horta 184 mil dollar na credit cards falso.
Falsifica credit cards: E acusacion cu Fiscal a presenta den Corte contra G.H. biba na Aruba, ta cu entre Juli 2021 y September 2022, a “skim” cantidad di credit cards. Tambe Fiscal ta acusa G.H., di ta forma parti di un organizacion criminal.
Durante tratamento di e caso, G.H. a bisa Hues cu un tal Alex y Diego a aserk’e pa saca potret di credit cards y lo paga 20 Dollar pa potret. G.H. a bisa Hues cu e conoce Alex pa basta tempo y door di esey, el a acepta e oferta. G.H., kende tabata traha e tempo ey den un restaurant, tabata coy e credit card di clientenan pa bay cashier, y somewhere aki e tabata saca potret di esaki manda pa Alex y Diego.
Hit American Express 184 mil Dollar: Hues a mustra cu tin denuncia di American Express na Polis di Aruba. Nan a informa cu tin 21 raport fraudulento di credit cards cu a suma 184 mil Dollar. Ta asina cu tin hasta potret di un persona cu a haci uso di e credit card falso na Miami. Investigacion di Polis a mustra cu 16 di e fraudenan ta haci door di G.H. kende e tempo ey tabata traha na e restaurant.
G.H. a bisa cu e ta admiti di a saca potret di credit cards. El a desmenti cu e potret saca na Miami ta di dje. El a bisa cu nunca el a bay Miami. Segun G.H., na dado momento e kier a stop, pero el a worde menaza. Hues a puntra G.H. kico tabata e intension di saca potret di credit cards. G.H. a bisa Hues cu e momento ey e no tabata sa kico tabata nan intencion. Awor e ta realiza cu loke el a haci ta malo.
A haya aparato di skimming: Pero no ta djis saca potret so! Relaciona cu e investigacion, ora cu a detene G.H. na su cas na September 2022, miembronan di Recherche a haci investigacion den e cas y a bin haya un aparato cu ta worde usa pa skimming, esta copia informacion di credit cards. Tambe a haya un laptop cu tin un aplicacion special aden.
Segun G.H. e no a usa e aparato. El a keda saca potret pero ora nan a pidi pa haci mas cos el a nenga. E tabata manda potretnan pa un tal Diego y Alex. Segun G.H. na dado momento nan a menace di mata su tata cu ta ciego y su famia. El a bisa cu na dado momento nan a yam’e y laga su tata papia cun’e. Esey ta pa mustra G.H. cu nan sa unda su tata ta biba. Segun G.H., e tabata saca potret di credit card di mesanan cu e tabata sirbi.
Total 1385 credit card falsifica: Ta asina cu den e smartphone di G.H. a bin haya 1.385 potret di credit card cu el a saca. Segun G.H. e no a haci’e pa placa. El a bisa Diego y Alex pa manda e placa Santo Domingo, riba cuenta di G.H. su ruman muher. E ta calcula 3 mil Dollar, nan lo a manda Santo Domingo. Ta asina cu G.H. a haya e aparato di skimming y e laptop for di e duo. Segun G.H., Alex a bis’e cu nan ta haciendo esey na Curacao, Sint Maarten tambe.
Fiscal bisa cu investigacion a mustra cu G.H. a saca 1385 potret. Esey kiermen cu G.H. a haya mas o menos 30 mil dollar y no e 3 mil dollar cu G.H. ta bisa. El a sigui bisa cu a haya aparato di skimming y laptop pa haci cosnan. Pero tin combersacion cu Diego cu ta mustra cu G.H. tabata manda potret via laptop tambe.
Exigencia di Fiscal: Fiscal a bisa Hues cu e caso aki a cuminsa ora cu American Express a haci denuncia na Polis di cu a usa credit cards falso y hit 184.190 dollar. Esaki na un restaurant na un Hotel. Relaciona cu e denuncia, dia 21 September 2022 G.H. a worde deteni y den camber a haya un aparato di skimming y un laptop computer. Fiscal a mustra cu den smartphone di G.H. a haya 1.385 potret saca di credit cards di cual 308 ta di American Express.
Na opinion di Fiscal, si bay conta tur e carchinan falsifica ta den miyones di dollar a worde horta. El a bisa cu G.H. tin suerte cu ta solamente American Express a haci denuncia.
Mester a usa skimming: Fiscal a mustra cu solamente saca potret di credit card bo no tin nada. Mester di informacion di e carchi y data di e carchi pa asina por falsifica esaki. Fiscal a bisa cu G.H. por nenga di a usa e aparato di skimming pero tin sospecho cu e tabata usa esaki y manda informacion riba laptop.
Fiscal ta haya cu G.H. ta forma parti di un organizacion criminal cu ta dedica su mes cu fraude di credit cards. Segun Fiscal, ta door di G.H. tur informacion di credit cards tabata worde manda pa Alex y Diego den exterior durante 1 aña y 3 luna.
Fiscal a baha pisa: Fiscal a anuncia cu lo bay cuminsa un caso pa kita propiedadnan mirando e cantidad di placa cu G.H. a gana pa saca potret. Fiscal a bisa cu skimming di credit cards ta sumamente fastioso tanto pa e usador di e credit card y e companianan cu ta facilita credit cards. Esaki ta mina sistema financiero y ta afecta turismo.
Fiscal a bisa cu mester manda señal bon cla cu no ta tolera skimming cu ta perhudica turismo di Aruba. El a exigi 3 aña di prison pa G.H. Haya cu mester manda señal bon cla cu no ta tolera esaki cu ta perhudica turismo di Aruba.
Abogado: mr. Gravenstijn a bisa Hues cu G.H. no tabata na Miami manera ta pretende. E no tabata e persona riba e potret saca na Miami. Segun e abogado, ta solamente 3 luna G.H. a saca potret. E no a usa e aparato di skimming. E no a hiba e aparato aki trabao. E solamente tabata saca potret. E abogado ta haya cu mester declara G.H. liber di a forma parti di un organizacion criminal y di e periodo cu ta acus’e di dje.
El a bisa cu G.H. ta lamenta loke el a haci. E abogado a menciona leynan cu ta mustra cu pa usa skimming ta 9 luna di prison y saca potret ta 3 luna. E ta haya e castigo exigi pa Fiscal exagera. El a pidi Hues pa duna G.H. castigo igual na loke el a sinta caba y un parti condicional.
G.H. na yoramento a pidi disculpa pa loke el a haci.
Hues a sera tratamento di e caso y a bisa cu dia 6 April 2023 lo tin sentencia.
