ORANJESTAD (AAN): Diabierna mainta Corte di Husticia a trata e tristo caso di hincamento, caminda un adolescente di 16 aña, a hinca su welo Alex Tromp di 77 aña mata.
Lamentable tabata e hecho cu Corte no a laga prensa cubri e caso. Sinembargo DIARIO a haya informacion pa su lectornan.
PORTA CERA PA PRENSA:
Ta asina cu Hues a dicidi cu ta trata e caso cu portanan sera pa prensa, pasobra ta haya e caso hopi delicado y cu ta trata di un mucha di 16 aña. Ta di lamenta cu Corte di Husticia ta tuma e decision aki siendo cu e redactornan cu ta asisti casonan di Corte tin palabracionnan bon cla haci den pasado cu difunto Hues mr. van der Griendt.
Antes ta casonan di inmoralidad tabata portanan sera. Despues cu a yega na palabracionnan cu Corte cu no ta publica nomber y tampoco potret di tanto e victima como e acusado, tabata permiti e redactornan cubri e casonan. E motibo cu a haci e palabracion aki tabata pasobra Aruba ta un comunidad chikito y ta proteha e victima.
Den e mesun rosea por haci cu casonan di muchanan cu ta haci delitonan serio. Curioso ta cu e tratamento ta cu portanan sera pero dia di e sentencia si ta cu portanan habri. O sea, e ora ey si ta permiti pa prensa scucha Hues su decision riba e caso y asina informa comunidad. Ta di spera cu pronto lo por yega na un palabracion pa asina prensa por sigui informa comunidad kico ta pasa den sala di Corte di Husticia di Aruba.
MUCHA TA HINCA WELO MATA:
Apesar di tabata portanan sera, DIARIO a logra haya suficiente informacion pa nos lectornan.
E lamentable caso aki a sosode dia 6 Januari 2021 na Madiki, caminda e mucha di inicial E. (16) a hinca su welo, difunto Alex Tromp (77) diferente biaha cu un cuchiu, cu consecuencia fatal.
EXIGENCIA DI FISCAL:
Fiscal ta lamenta loke a sosode y ta haya E. culpable. Fiscal a exigi castigo hubenil di 4 aña di prison pa E., di cual 1 aña ta condicional cu un tempo di prueba di 2 aña y bou guia di Reclasering. Hues, despues di a scucha defensa di abogado, a bisa cu e ta bay studia e caso y dia 20 di Juli 2021 lo tin sentencia.
