ORANJESTAD (AAN): Diabierna mainta Hues di Corte di Husticia a baha pisa riba e duo R.v.d.B. y N.B. kendenan hunto cu e hoben G.M. a haci un atraco cu violencia pisa riba dos homber di 71 aña y bay cu tur nan pertenencianan.
Hues a condena N.B. na 7 aña di prison mientras cu R.v.d.B. na 6 aña y 4 luna di prison. G.M. tabata menor di edad tempo cu a haci e atraco aki y pesey Hues a aplica e ley hubenil cu condicionnan mara na esaki.
Via video conference e sentencia a tuma lugar caminda e acusadonan tabata den un oficina na KIA y den sala di Corte tabata Hues, Fiscal y e abogadonan.
ATRACO CU VIOLENCIA
Ta asina cu tin 4 acusado cu ta wordo acusa di un serie di delitonan pero R.v.d.B., N.B. y G.M. tabata esnan cu a atraca e hombernan W. y B. di 71 aña. Luna pasa ora di tratamento di e caso, Fiscal a laga pasa den corte e video di seguridad caminda ta mira cu e trio aki den un auto a sigui W. y B. kendenan a bay bebe na China Town. Nan a keda para ey dilanti te ora cu W. y B. a sali pa bay cas. Nan a sigui nan y ora W. y B. a yega nan cas, e trio a para auto y bay ataca nan. Ta asina cu un di e victimanan mester a wordo opera door di a sla cu el a sufri.
Fiscal a exigi 7 aña di prison pa R.v.d.B. y N.B. mientras cu pa G.M. kende e tempo ey tabatin 17 aña a exigi 18 luna di prison di cual 6 luna ta condicional cu 2 aña di prueba y bou guia di Reclassering.
SENTENCIA
Hues den su sentencia a mustra cu e ta haya legalmente proba cu e trio R.v.d.B., N.B. y G.M. a haci e atraco cu violencia riba e dos hombernan di edad. Hues a bisa cu e ta haya hopi cruel cu e trio a bay maltrata dos homber di edad y bay cu tur nan pertenencianan. El a bisa cu un di nan mester a wordo hospitaliza. Ta asina cu e hombernan B. y W. a demanda placa pa nan joyas cu a wordo horta. Hues a mustra cu e cellular di B. a wordo haya na cas di R.v.d.B. El a rechaza e demanda di e hombernan di edad pasobra e ta haya cu no a hustifica suficiente e demanda. El a bisa cu tanto B. como W. por cuminsa un caso civil.
Huez a bisa G.M. cu tempo el a haci e atraco e tabata menor di edad. Hues a aplica castigo hubenil y a condena G.M. na 15 luna di prison di cual 6 luna ta condicional cu un tempo di prueba di 3 aña. Hues a pone como condicion cu G.M. lo mester cay bao guia di Reclassering. Ademas Hues a ordena pa G.M. haci 120 ora di enseñanza bou guia di Reclassering sino e lo mester bay 60 dia sera. cond.
Pa loke ta N.B, Hues a bisa cu ademas di e atraco, N.B. ta culpable pa 2 ladronicia na cas di hende. Hues a confirma e exigencia di Fiscal y a condena N.B. na 7 aña di prison.
E acusado B.B. ta wordo acusa di ladronicia for di un cas, encubrimento di un renchi di oro procendente di e atraco. Hues a bisa cu no tin suficiente prueba cu a horta for di cas. El a bisa cu Polis ariba video lo a reconoce tattoo na pia di B.B. pero Hues no ta haya esaki suficiente. El a bisa cu no tin indicacion specifico cu por conclui cu e persona ta B.B.
Pa loke ta e renchi, e doño a reconoce su renchi. Fiscal a exigi 2 aña di prison pero door cu Hues a declara B.B. liber pa ladronicia di cas, mester reduci e castigo. Hues a ordena cu e renchi di oro ta bay bek pa su doño. E otro joyas confisca ta bay bek pa B.B. Hues a condena B.B. na 3 luna di prison.
R.v.d.B., Hues ta hay’e culpable di e atraco cu violencia y encubrimento di un cantidad di joyas cu ta procedente di ladronicia. Ta asina cu a haya R.v.d.B. cu marihuana y Hues a ordena pa destrui e droga y tur articulo cu tin di haci cu droga. Mayoria di e joyas y holoshi cu a confisca na cas di R.v.d.B., ta bay bek pa nan doño. Hues a bisa cu e mas di 2 mil florin, cadenanan di oro y algun cellular cu tambe a confisca, ta bay bek pa R.v.d.B. Hues a condena R.v.d.B. na 76 luna ( 6 aña y 4 luna) di prison.
