E dama victima a grita e señora di e acusado den Corte
ORANJESTAD (AAN): Diabierna mainta durante e sentencia di e homber B.P., tabatin momentonan di tension den sala di Corte. Un momento Hues mester a hala atencion di tanto e dama victima K. como e señora di e acusado B.P. Despues tabatin un momento cu e dama K. a grita e señora di B.P.
Hues ta haya cu B.P. ta culpable di a maltrata, viola, menaza cu morto y tattoo e dama K. Hues a bisa cu e no ta kere e dama K. cu e mes tabata kier pa B.P. a maltrat’e, abusa di dje y pone tatuahe na diferente parti di su curpa. Hues a conclui cu e castigo exigi pa Fiscal ta na su lugar y a confirma e 6 aña di prison.
Exigencia fiscal: Dia 8 di Juli 2022, Fiscal a bisa Hues cu B.P. ta bisa cu e no a forza K. pa haci tattoo. El a bisa cu e tabata mara, maltrata K. y despues ta tene relacion sexual. Fiscal ta haya cu aki no por papia di tin relacion sexual voluntario. E ta haya cu B.P. tabata domina y controla K. y pesey a pone su nomber tattoo riba K. Despues K. kier hala denuncia aden. Na opinion di Fiscal, esey no ta haci cambio den e caso. El a mustra cu cuater biaha K. a declara con el a wordo viola, maltrata y obliga door di B.P. Fiscal a bisa cu K. tabata asina bou di dominio di B.P., cu e kier keda cu B.P. Awor K. ta sinti cu ta door di dje, B.P. ta sera.
El a hala su denuncia aden pa asina B.P. por ta liber pasobra e kier B.P. E no a bisa cu e cosnan cu a sosode no ta berdad pero cu e mes tabata kier. Fiscal a bisa cu esey no ta kita afor cu B.P. ta castigabel. Fiscal a bisa cu e no ta haya cu K. a duna permiso sino ta bou di presion di B.P., K. tabata laga B.P. haci loke e kier. E ta haya cu premedita B.P. a maltrata, viola, menaza e dama K. El a mustra cu psicologo o ta mustra cu B.P. ta responsabel pa loke el a haci. Segun Corte Supremo, haci tattoo di e forma aki ta wordo considera como maltrato severo. E marcanan cu K. tabatin di e maltrato por wordo considera como maltrato severo.
Fiscal no ta haya na su lugar un castigo combina. Esey no ta haci husticia pa e seriedad di e caso. Ta diferente biaha el a menaza, maltrata, viola e dama. Fiscal a exigi 6 aña di prison, kitando e tempo cu B.P. ta sera den KIA.
Sentencia: Den sala di Corte tabata presente e dama K. y e señora di B.P., abogado mr. Mohamed, Fiscal y Hues, mientras cu B.P. tabata den un oficina na KIA. Hues via video conference, a bisa cu e ta haya legalmente proba cu B.P. a haci practicamente tur e acusacionnan. Hues a bisa cu solamente e acusacion di sicratriznan cu no por wordo considera herida severo.
Hues a bisa cu e ta haya legalmente proba cu B.P. a maltrata e dama K. cu taser y menaza cu arma no di berdad cu morto varios biaha. K. no tabata sa cu e arma no ta di berdad. Esey a causa panico serca K. Hues ta haya cu B.P. a viola e dama K.
No kere cu victima tabata kier maltrato: Pa loke ta e hecho cu e dama K. ta bisa cu el a duna B.P. permiso pa haci tur e cosnan cun’e, Hues a bisa cu e ta pone un banda e declaracion di K. Hues a mustra cu e declaracionnan di K. na Polis ta mustra cu e maltratonan di B.P. ta contra su voluntad. K. a declara cu esakinan ta reglanan di B.P. Hues a mustra cu K. a declara cu e tabatin miedo di B.P. pasobra B.P. a menace cu arma. Tambe el a bisa cu no tabatin ningun palabracion cu e ta wordo maltrata door di B.P. Hues a mustra cu dia 7 Januari 2022, dia di detencion di B.P., mama di K. a bisa cu K. a bis’e cu B.P. a exigi pa K. bay cerca dje sino B.P. ta kap'e. Tambe K. a bisa e mama cu B.P. a menaza cu lo tir’e mata. K. a bay sconde cerca un amiga. Hues a sigui mustra cu dia 7 Januari 2022, e prima di K. a mira K. ta hopi nervioso y K. a bis’e cu B.P. a bisa cu lo kap'e. E dia ey K. a conta Polis cu e no por mas cu e relacion cu B.P. y cu B.P. a bis’e cu e lo kap’e 3 biaha. El a bisa Polis cu B.P. a menace cu un arma di candela.
Hues a remarca cu si un hende ta laga haci tur cos cu e mes ta gusta, pakico 7 Januari 2022 el a bay den panico. E no ta logico! El a mustra cu dia 14 Februari 2022, K. a duna declaracion na Polis yorando y un dia despues e ta manda un carta na Fiscal cu tur cos a sosode cu su permiso y cu e ta hala su declaracion aden.
Hues ta conclui cu e no ta kere loke K. a duna permiso pa B.P. maltrat’e. El a bisa B.P., si bay kere mes e declaracion di K. y B.P., cu tur cos a bay segun palabracion esta relacion sexual cu violencia, esey no kiermen cu B.P. por haci tur loke e kier cu K. y cu K. mester guli manda abao. E ta haya cu B.P. mester check si K. ta di acuerdo cu loke B.P. kier haci. El a mustra cu e hecho cu despues di e maltrato nan tabata papia riba loke a sosode y despues tin relacion sexual, ta mustra cu K. no tabata di acuerdo cu loke B.P. tabata haci. Hues a bisa cu for di tratamento di caso no por a saca afor cu B.P. por a kere cu K. mes tabata kier maltrato.
Tattoonan considera maltrato severo: Hues ta haya cu e tattoonan cu B.P. a haci riba curpa di K. tabata contra voluntad di K. El a mustra cu K. a yora na Polis cu door di e tattoonan ningun homber lo kier ta cun’e. Hues a mustra cu segun sentencia di Corte Supremo, e forma di haci tattoo ta wordo considera maltrato severo. Tambe e penetracion brutal den parti patras di K. cu a keda sangra te cu mester a hib’e hospital, ta wordo considera maltrato severo. Hues tambe ta haya proba violacion.
Acusado no a mustra duele: Hues pa cu e castigo, a tene cuenta cu B.P. a pone un persona sufri. Hues ta haya cu B.P. solamente tabata pensa pa satisface su mes y no con e dama K. lo sinti. El a tene cuenta tambe cu B.P. a pone tattoo riba K. sin pensa riba K. su futuro. Hues a mustra cu B.P. ta casa y tin yiu pero K. no. Hues tambe a tene cuenta cu raport di psicologo. Hues a bisa cu el a keda preocupa pasobra B.P. no a mustra cu e ta compronde cu loke el a haci no ta bon.
Hues ta haya e castigo cu Fiscal a pidi na su lugar. El a condena B.P. na 6 aña di prison.
Hues a para victima y señora di acusado: Por a constata cu ora cu Hues tabata lesa su sentencia, na dos ocasion e victima K. a bisa duro den sala cu e mes tabata kier pa e acusado maltrat’e. Hues a hala K. su atencion cu e mester keda keto pasobra awor ta Hues ta bisando sentencia.
Despues ora cu Hues a condena B.P. na 6 aña di prison, e señora di B.P. a lanta para y cu man na halto pa por papia. Hues a bisa e señora cu e no por papia mas pasobra ta Hues ta bisa e sentencia y nada mas. E seָñora a bisa cu e ta compronde pero e kier puntra algo. Hues a para riba cu no por bisa nada mas. Emociona e señora a puntra pakico nan no a puntr’e kico a pasa di su banda. E momento ey abogado mr. Mohamed a bisa e señora cu e lo papia cu e señora despues mientras cu Hues a lanta bay.
Victima a grita señora: Ta asina cu tanto e victima como e señora di B.P. a cuminsa yora ora Hues a bisa cu e ta condena B.P. na 6 aña di prison. Despues cu Hues a nenga e señora pa papia y a lanta bay, e victima K. a keda sinta yora. E señora a bay cerca dje y bis’e pa nan sali bay. E dama K. a grit’e e señora esaki ta bo culpa pasobra abo a gaña. E señora a sali bay y abogado mr. Mohamed a keda warda na e porta di sala y bisa K. cu e mester sali. Un rato despues K. a sali.
