Ta sospecha cu el a bin for di Hulanda pa venga asesinato di su ruman
ORANJESTAD (AAN): E homber A.G.(23) ayera mainta a keda bisa Hues cu el a bay coy e arma cu su ruman asesina, Anthony Carti tabatin scondi, pa e deshaci di esaki. E no tabata kier pa otro hende yega haya e arma aki. Fiscal a bisa cu Polis a haya tip cu A.G. a bin for di Hulanda pa venga asesinato di su ruman.
El a exigi 12 luna di prison di cual 3 luna ta condicional, Hues despues di a scucha abogado mr. Odor a dicta sentencia di biaha. E ta haya A.G. ta culpabel di posesion di arma di candela. El a tene cuenta cu e arma tabata den un tas bao di un cusinchi. Hues no a sigui exigencia di Fiscal y a condena A.G. na 9 luna di prison, di cual 3 luna ta condicional.
SOSPECHA CU KIER A VENGA ASESINATO DI RUMAN
Fiscal a bisa cu e acusacion contra A.G. ta cu riba 11 December 2022, e tabatin un revolver cu 5 bala cla pa tira. Hues a mustra cu segun e relato di Polis, Polis a haya informacion cu A.G. a bin for di Hulanda cu intension di venga asesinato di su ruman homber. Esey tabata motibo cu Polis a bay na cas di mayornan di A.G. caminda den un camber bou di cusinchi a haya un tas den cual tabatin un revolver cu 5 bala, cla pa tira.
KIER A DESHACI DI ARMA
Hues a bisa A.G. kico e tin di bisa riba esaki. Segun A.G., el a bin Aruba for Hulanda pa dera su ruman homber. El a bay den un mondi na Tanki Leendert, caminda patras di un baranca grandi, e arma tabata lora den un paña y un poco dera. Segun A.G., su intension tabata pa deshaci di e arma, pasobra e tabatin miedo cu otro hende lo haya e arma aki. El a bisa Hues cu e tabata kier a bay tira e arma den laman na Zeewijk. El a hiba e arma na cas di su mayornan na Pos Chiquito y un rato despues Polis a yega. A haci investigacion den e cas y a bin haya e arma y a detene varios hende den e cas. A.G. na dado momento a bisa cu el a bin cu e arma.
El a splica Hues cu e arma ta di su ruman homber cu a wordo tira mata. El a bisa cu promer cu su ruman a wordo tira mata, e tabata papia cu su ruman y su ruman a bis’e cu e tin un arma scondi.
Hues a remarca cu A.G. ta bin for di Hulanda pa dera su ruman. E ta imagina cu A.G. lo ta rabia pasobra a tira su ruman mata y promer cos cu e ta haci, ta bay busca e arma.
Fiscal a bisa cu net A.G. a yega Aruba, a bay busca e arma. Fiscal a remarca, pakico e arma tabata den un tas di A.G. riba un cama y cla pa tira. Den e tas tabatin documentonan di A.G. Segun A.G. e tabatin e arma na cas pa despues bay bent’e den laman. Fiscal a puntra pakico no a duna e arma na Polis. A.G. a bisa Fiscal, cu e no a pensa esey.
NO KIER LAGA CHECK CELLULAR
Fiscal a remarca cu A.G. no kier laga Polis listra den su cellular. El a puntra A.G. si awor e ta dispuesto pa duna permiso pa listra den e cellular. A.G. a bisa cu e no kier pasobra e tin cosnan priva di su hendenan. Fiscal a remarca cu por ta tin informacion cu A.G. a bin Aruba pa tuma revancha. El a bisa Hues cu e cellular ta actualmente na Curacao pa investigacion. Si despues resulta cu tin cosnan serio den e cellular, A.G. por spera cu lo tin un otro caso.
CARCHI DI CASTIGO
Hues a puntra A.G. si e tin carchi di castigo. A.G. a bisa cu na 2019, Corte a declar’e liber di intento di tira mata cu arma di candela. Hues a bisa cu tin dos acusacion y pa e intento di mata, A.G. a wordo declara liber pero a wordo condena pa menaza.
FISCAL
Fiscal ta mustra cu 5 December 2022 e ruman homber di A.G., Anthony Carti a wordo tira mata na South Beach. Durante investigacion, informacion a drenta na Polis cu e ruman homber lo ta biniendo Aruba pa tuma venganza riba esun cu a tira su ruman mata. Polis a bay haci investigacion na e cas na Pos Chiquito y a haya un arma den un tas y riba cama. E revolver tabatin 5 bala y tabata cla pa tira. Fiscal a bisa cu e no ta kere cu A.G. kier a deshaci di e arma. El a remarca, pakico A.G. no a yama Polis. E ta haya cu A.G. ta culpable di posesion di arma.
EXIGI CASTIGO
Pa cu e castigo, Fiscal a bisa cu arma di candela ta un problema hopi serio na Aruba. E ta causa hopi miedo den comunidad. E asesinato di e ruman homber di A.G. ta un ehempel. Fiscal a mustra cu Hof a duna 9 luna di prison pa un arma warda den un cashi. Pa arma di candela den auto a duna 15 luna. Den e caso di A.G., Fiscal a bisa cu aki ta papia di un arma cu tabata cla pa tira y den un tas hinca. Fiscal a exigi 12 luna di prison di cual 3 luna ta condicional cu un tempo di prueba di 3 aña. Fiscal a exigi pa destrui e arma.
ABOGADO
Mr. Odor a bisa Hues cu e intension di A.G. tabata pa deshaci di e arma y tir’e den laman na Zeewijk. Ningun momento A.G. kier a venga asesinato di su ruman homber. E abogado a bisa cu e arma tabata den un tas y bou di un cusinchi. El a pidi Hues pa baha e castigo exigi pa Fiscal.
SENTENCIA
Hues a sera tratamento di e caso y a dicta sentencia di biaha. Hues a bisa cu a keda proba cu A.G. tabatin un arma den su poder. Hues a bisa cu A.G. a bisa cu el a bay busca e arma pa deshaci di dje. Hues a bisa cu segun orientacion di castigo pa posesion di arma den cas ta 9 luna di prison. Hues no sigui Fiscal cu tabatin motibo di peso. E arma tabata den un cas bou cusinchi. Hues a condena A.G. na 9 luna di prison di cual 3 luna ta condicional y 3 aña di prueba. Hues a duna orden tambe pa destrui e arma.
