Entrante 1 October 2023
ORANJESTAD (AAN): Dia prome di October 2023 e reglamento di proceso nobo pa casonan civil ta drenta na vigor. E ta un procedura mucho mas practico caminda e partidonan mes lo por haci e caso sin mester di asistencia di abogado. For di vocero di Corte Comun di Husticia di Curacao, Aruba, BES y Sint Maarten, por a compronde cu e reglamento uniforme aki ta aplicabel pa proceduranan di derecho civil cerca e cuater Cortenan di Prome Instancia (Aruba, Curacao, BES y Sint Maarten) y cerca Corte di Apelacion.
Den e reglamento aki a inclui un areglo special pa e asina yama "small claims". Cu esey a codifica un procedura rapido, simpel y barata pa demandanan di placa te cu un maximo di
f 10.000 ($ 5,587) den e marco di e legislacion existente. Cu e areglo aki, ciudadanonan lo tin acceso mas facil na husticia.
E procedura ta cuminsa cu un peticion cu e demandante ta entrega na Griffie di Corte, conforme e formulario modelo "peticion pa small claim" cu Corte a pone na disposicion riba su website.
Na e momento ey, e demandante ta paga griffierechten di f 50 ($ 28). Demandantenan cu ta actua den capacidad di un profesional of empresa ta paga dobel e montante aki. No ta rekeri stampia pa e procedura aki. Manera ta conta pa tur proceduranan cerca Cortenan di Prome Instancia y Corte di Apelacion, ciudadanonan (personanan y empresanan) mes por procede nan mes y no ta obligatorio haci uso di un abogado.
Despues cu e peticion a ser entrega, Hues ta determina un fecha pa trata e caso, y Griffie di Corte ta invita e parti demanda via carta of coreo electronico. No tin gasto mara na esey pa e partidonan envolvi.
E parti demanda por entrega un defensa por escrito prome cu e sesion tuma lugar, pero
e no ta obliga di haci’e. Durante e sesion di small claim, Hues ta discuti e caso cu e partidonan, y
ta determina si tin posibilidad di yega na un acuerdo amistoso of si por dicidi mesora. Si e caso
ta demasiado complica pa por haci esey, Hues ta transferi e caso na un sesion normal. E
transferencia aki tampoco tin gasto mara na dje pa e partidonan.
Tin mas cambio cu a ser haci na e reglamento di proceso cu e meta di mehora y acelera e proceso civil. E reglamento di proceso nobo y e formulario modelo "peticion small claim" a ser publica riba e website di Corte Comun (www.gemhofvanjustitie.org/nieuws/publicaties ).
