Fiscal ta mustra den Corte
*Awor si tin indicacion fuerte cu ta Anderson Rasmijn ta esun
ORANJESTAD (AAN): Manera DIARIO a publica, tratamento di e caso asesinato John Poentje Castro, a dura di 8.30 di mainta te den careda di 4’or di atardi. Tabatin pause tuma pero esey no ta kita afor cu tabatin hopi informacion interesante cu DIARIO lo ta publicando. Un di e informacionnan cu a sali na cla ta cu Fiscal ta admiti cu e investigacion di asesinato di John Poentje Castro na 2010 no tabata bon y el a pidi disculpa pa esaki y cu finalmente investigacion cu a haci awor tin indicacion fuerte cu ta Anderson Rasmijn ta esun cu a tira John Poentje Castro mata.
INVESTIGACION NO TABATA OPTIMAL
Fiscal den su rekisitorio a mustra cu e investigacion na 2010 y 2011 relaciona cu e asesinato di John Poentje Castro riba 22 December 2010, no tabata optimal. Mas ainda Fiscal, den un forma honesto, a bisa cu for di Ministerio Publico, referiendo aki na e Fiscal cu e tempo ey tabata encarga cu e investigacion, no a guia e investigacion manera mester ta. Fiscal a pidi disculpa pa esaki, especialmente na e familiar di John Poentje Castro.
E di dos team di investigacion “Apollo 2”, a hay’e confronta cu hopi documento original di e investigacion no tabata tey mas y a haya copianan. Den e relato di e caso “dossier” tur esaki ta wordo menciona pa ta transparente.
TA MIRA RASMIJN RIBA VIDEO
Fiscal ta mustra cu e investigacion hiba pa team “Apollo 2” ta mustra cu a haya imagennan di video di seguridad di un complex di apartamento den Spechtstraat cu ta keda hopi serca di unda John Poentje Castro ta biba. E cas di John Poentje Castro ta keda den e birada di Apollostraat y Weststraat.
Riba e imagennan por mira cu 10.16 di anochi ta bin un Nissan Sentra cu glasnan getint for den Rudolf Arendstraat cu ta e caya net patras na unda e lamentable incidente a sosode. E auto Nissan Sentra a bay para den Spechtstraat y a mira un persona, cu despues di tur investigacion, a resulta di ta Anderson Rasmijn, cana bay den direccion di Rudolf Arendstraat.
TIN TESTIGO A MIRA RASMIJN TA CORE
Mas o menos 10.39 di anochi ta mira Anderson Rasmijn for di Rudolf Arendstraat ta core na pia bay bek Spechtstraat. E tabatin algo den su man robez ta sconde bou di su t-shirt na altura di su cintura di carson. Tin un testigo cu ta biba den Spechtstraat cu a mira Rasmijn mas o menos 10.20 anochi ta pasa dilanti di su cas na coremento. Ora e homber a mir’e, Rasmijn a cuminsa cana y despues di a pasa e cas el a bolbe cuminsa core. E homber testigo a mira Rasmijn core bay na e Nissan Sentra.
PROMER BIAHA CU A DETENE RASMIJN
Algun luna despues, dia 21 Mei 2011 a detene Rasmijn relaciona cu un otro caso. Dia 31 Mei 2011, el a wordo laga liber y algun ora despues ta bolbe wordo deteni pa un otro caso. Door cu su potret a wordo publica, esnan cu tabata investiga e asesinato di John Poentje Castro, a compara e potret cu esun di camera di seguridad di Spechtstraat. A bin ripara cu tin hopi similaridad y esey a conduci na investigacion. Den un maleta a bin haya paña di Rasmijn cu ta cuadra cu loke ta mira riba e camera di seguridad den Spechtstraat. Durante un interogacion di Rasmijn riba 9 Juni 2011, e miembro di Recherche a ripara cu e keds cu Rasmijn tabatin bisti, ta cuadra cu esun cu ta mira riba e camera di seguridad. E confisca e keds.
YAMADA ANONIMO TA MUSTRA RIBA RASMIJN
Algun dia despues di detencion di Rasmijn riba 25 Mei 2011. E persona a bisa cu e persona cu tin deteni, Anderson Rasmijn, ta esun cu a tira John Poentje Castro mata. E persona a bisa cu Rasmijn ta haci kico cu ta, con tal cu paga. E persona no kier a menciona su nomber pa no tuma represaya contra dje.
RASMIJN TA USA ARMA Y TA ADICTO
Dia 22 Augustus 2011 tabata e promer biaha cu ta interoga Rasmijn. No a papia di e asesinato sino di su mes. Eynan Rasmijn ta bisa cu e ta forma parti di e gang di Dakota y cu tin problema cu e gang di Madiki. Tambe el a bisa cu e tabata e promer cu a usa arma di candela na e parada di bus grandi na Oranjestad. El a bisa cu e ta adicto na droga.
RASMIJN TA NENGA DI A MATA POENTJE
8 September 2011 tabata e promer biaha cu a interoga Rasmijn riba e asesinato di Poentje y Rasmijn ta desmenti. El a bisa cu e sa bay Madiki solamente pa cumpra heroina.
INVESTIGACION A PARA
Fiscal ta mustra cu no ta conoci pakico a para e investigacion. No a haya documentonan relaciona cu esaki.
INVESTIGACION NOBO TA MUSTRA CU TA RASMIJN
Fiscal a mustra cu na 2021 a cuminsa cu e investigacion atrobe y e team “Apollo 2” bou di su guia a bay scucha Yamada caminda ta scucha hende ta bisa pa bisa e muher pa no bisa nada di e asesinato di Poentje Castro. Investigacion a bin dal riba e testigo K.M.G., kende a bisa cu Rasmijn ta esun cu a mata Poentje Castro. Ta asina cu K.M.G. hunto cu Rasmijn a yega di cay sera den pasado pa atraco. K.M.G. a bisa cu Rasmijn a dun’e un saco pa wanta p’e y a bis’e pa no mira den e saco. Segun K.M.G. el a wak tog den e saco y a mira un arma di candela. Despues Rasmijn lo a bis’e cu esey ta e arma cu el a tira mata Poentje Castro. Tambe Fiscal a mustra con den e Van di transporta detenido, a pone grabador y a scucha combersacion entre K.M.G. y Rasmijn ora mester a transporta nan. Eynan claramente ta scucha K.M.G. bisa Rasmijn pa bisa e berdad cu el a mata Poentje. Tambe ta scucha Rasmijn bisa K.M.G. pa hala su declaracion aden y no bisa nada mas y e lo sali liber.
Tur e puntonan aki ta pone Fiscal conclui cu ta Anderson Rasmijn ta esun cu a tira John Poentje Castro mata riba 22 December 2010.
