El a baha cabez pa decision di Hof y Hues di Corte di Aruba
ORANJESTAD (AAN): Tabatin un desaroyo positivo pa Melony Croes-Paesch siman cu a pasa pa cu e apelacion di casacion di Procurador General contra e decision di Hof cu ta declara Melony Croes-Paesch liber. Ta asina cu Procurador General a notifica abogado mr. Illes cu e ta hala aden e apelacion contra declara Melony Croes-Paesch liber di labamento di placa. Esaki ta nifica cu Procurador General (PG) a baha cabez pa e decision di Hof di 12 October 2021 y tambe e decision di Hues di Corte den Promer Instancia di Aruba di 2 December 2021. Melony Croes-Paesch ta liber di acusacion di labamento di placa.
HOF A DECLARA MELONY LIBER DI LABAMENTO DI PLACA
Dia 12 di October 2021, Hof di Corte Superior a dicta sentencia den e apelacion caso IBIS. Hof den e casonan penal contra Melony Croes-Paesch, a dicidi cu no a keda proba e labamento di placa relaciona cu negoshi di Melony Croes-Paesch. Hof si ta haya proba cu Melony Croes-Paesch a laga drenta un dama ilegal. Pa cu e castigo, Hof a bisa cu e ta tene cuenta cu e caso aki a afecta tanto Melony como Paul Croes nan bida hopi. Tambe Hof a tene cuenta cu e bida politico di Melony su casa a caba. Hof su decision ta cu e ta declara Melony Croes-Paesch liber di labamento di placa. Pa e otro caso, Hof a condena Melony Croes-Paesch na 120 ora di trabao pa comunidad of 60 dia sera.
MINISTERIO PUBLICO A APELA SENTENCIA
Apenas dos dia despues di e sentencia di Hof di Corte Superior, 14 October 2021, Ministerio Publico a apela contra e sentencia di Hof cu a declara Melony Croes-Paesch liber di labamento di placa.
HUES A RECHAZA MINISTERIO PUBLICO
Dia 2 di December 2021, Hues a dicta sentencia den e caso cu Fiscal di Ministerio Publico a cuminsa contra Paul Croes y Melony Croes-Paesch pa kita propiedadnan relaciona cu e casonan di labamento di placa.
Hues a bisa cu e ta rechaza e peticion di Fiscal pa pospone e caso penal contra Melony Croes-Paesch pendiente e caso di casacion. Hues a mustra cu Hof di Corte Superior a declara Melony liber di e acusacion di labamento di placa di alrededor di 209 mil florin. Hues a bisa cu e ta mantene e decision di Hof y a declara Fiscal no admisibel den e caso contra Melony Croes-Paesch.
Pa loke ta e exigencia di Fiscal pa Paul Croes paga algo mas di 207 mil florin, Hues a bisa cu tin diferencia di opinion entre Fiscal y abogado mr. Illes. Fiscal a calcula riba e 183 mil florin cu Hof a determina, placanan di construccion cu na opinion di Fiscal no tin claridad. Abogado mr. Illes ta haya cu mester mantene e 183 mil florin.
Hues a bisa cu e no ta sigui Fiscal den esaki y ta mantene e suma stipula pa Hof cu ta 183 mil florin cu Paul Croes a laba y mester paga bek.
AINDA NO TIN CASACION DI PAUL CROES
Den combersacion cu mr. Illes a puntra si ya a trata e casacion di Paul Croes. E abogado a splica cu no ta bay tin tratamento di caso, manera a sosode na Corte den Promer Instancia y den Corte Superior. El a splica cu e caso di casacion lo ta riba papel o sea abogado lo manda su punto di bista y Procurador General ta manda su punto di bista riba papel. Seis Hues lo evalua esaki y tambe e sentencianan di Corte den Promer Instancia y Hof di Corte Superior. Mr. Illes a splica cu abogado mr. Franken ta haci esaki pasobra e ta un abogado di casacion. Esey ta nifica cu ainda mester warda riba resultado di e desaroyo aki.
