Tres Hues tabata atak’e cu preguntanan
ORANJESTAD (AAN) – Dialuna mainta y merdia, den sala di Corte di Husticia di Aruba, Hof di Corte Superior a trata e apelacion di caso IBIS. Den sala di Corte tabata presente Paul Croes, Melony Croes Paesch, Jairo Wever, Robio Di Vecchia, Ninosca Nunez, Rudmilla Martinus.
Ta asina cu Ministerio Publico a apela e sentencianan mientras cu Paul Croes, Melony Croes Paesch y Wever a apela tambe e sentencia.
Tres Hues cu ta forma Hof tabata presente y a splica con a planea e proximo dianan pa cu tratamento di e caso.
ACUSACIONNAN
Procurador General (PG) a presenta e acusacionnan y a cuminsa cu e caso Melony, kende ta wordo acusa cu entre 1 Januari 2014 y Maart 2017, el a laba placa. Tambe PG ta acusa Melony cu entre 20 December 2016 y Maart 2017, a laga drenta e dama S. cu tabata ilegal.
Wever ta wordo acusa cu dia 8 Maart 2017, el a duna 1500 florin na Paul Croes, pa asina laga regla permiso. Di Vecchia ta wordo acusa cu entre 1 Februari 2015 y Maart 2017, a duna regalo servicio na Paul Croes. A duna descuento special pa instalacion airco, pa asina haya permiso regla. Nuñez ta wordo acusa cu entre 30 Oktober 2016 y Maart 2017, a duna placa na Paul Croes pa regla dispensacion di permiso. Tambe PG a menciona cu entre 1 Januari 2014 y 2017 un serie di lugarnan lo a facilita placa na Paul Croes.
PG ta acusa Paul Croes di labamento di placa na e fundacion di Paul Croes, Excellence. Tambe cu Paul Croes a laga e dama S. drenta Aruba ilegal. PG tambe ta acusa Paul Croes di ta forma parti di un organizacion criminal dedica na labamento placa. Martinus ta wordo acusa cu entre 2016 y 2017 a duna Excelence of Arends placa pa regla permiso.
CUMPRAMENTO DI PAUL CROES
Hof a cuminsa cu e acusacion di cumpramento di Paul Croes door di comerciantenan. Segun Paul nunca el a pidi placa pa regla dispensacion of pa permiso pa hendenan. Paul a bisa Hof cu Ministerio Publico ta interpreta robez. El a bisa cu e placa y fabornan tabata unicamente pa campaña politico y no tin nada di haci cu dispensacion of dunamento pa permiso. Hof mustra cu tin comerciante a bisa cu nan a haci’e pa asina haya permiso of dispensacion.
Paul a bisa cu e pidimento di caha di cerbez of placa di ticket pa concierto no tin nada di haci cu dunamento di permiso sino e campaña politico. El a bisa cu e ta haya cu na un forma inhusto y bou di presion, cierto comerciantenan a duna declaracionnan pa perhudik’e.
TA INTERPRETA COS ROBEZ
Hopi emociona Paul a expresa cu ta interpreta robez cu ora el a pidi comerciante cahanan di cerbez pa concierto di partido “Concierto di Speranza”, cu esaki tabata pa regla permiso. Hof ta bisa cu con por interpreta robez. Segun Paul, el a acerca 13 negoshi pa cumpra ticket pa e concierto di partido. E ticket ta costa 100 dollar y con ta pinta esaki cu dunamento di permiso. El a bisa cu ta 90 negoshi a haya permiso pa hendenan di exterior. No ta manera Ministerio Publico ta pinta e cosnan cu e lo tabata presiona comerciante pa cumpra ticket of haci donacion y asina lo duna dispensacion of permiso. El a bisa cu hopi negoshi a cumpra ticket den pasado promer cu e tabata minister.
Hopi emociona el a bisa cu a tap combersacionnan di dje cu amistadnan di hopi aña y ta interpreta cu lo ta cumpramento. Tabatin combersacion tocante permiso y a interpreta robez cu e lo a haya placa of fabor pa asina regla permiso. Paul a señala cu den e scuchamento di yamadanan, tin hende a bisa cu mil amor lo yuda y a interpreta esaki cu ta mil florin lo yuda. El a bisa Hof cu e caso aki ta masha hopi presion riba su famia. 8 luna largo a investig’e. Door di e caso aki, hopi amistad, famia a distancia di dje.
PAUL TA SPLICA TOCANTE PERMISO
Hof a remarca con por ta cu un cantidad di permiso cu DPL a nenga, Paul si a aproba. Paul a bisa cu DPL su maneho tabata cu pa promer peticion pa permiso, ta nenga pa asina crea trabao den comunidad. Paul a bisa cu a cambia e maneho caminda a mira cu e cantidad di permiso a keda baha.
Hof a mustra cu DPL mes a reacciona cu sin ningun argumento, Paul ta duna aprobacion. Paul a bisa Hof cu e tabata duna aprobacion pasobra no tabatin hende pa traha. El a mustra cu durante añanan a mira cu e nengamento di DPL a baha.
