ORANJESTAD (AAN): Un pareha di edad a mustra cu ya nan ta harta y fada, y ta dicidi di hiba nan bisiña dilanti un Huez na Alemania,
pasobra nan no por soporta mas e gai cu nan tin como mascota. E animal ta canta como 200 biaha pa dia.
Friedrich-Wilhelm K. di 76 aña y su casa Jutta, a bisa cu e gai cu tin e nomber Magda, ta cuminza canta for di 8:00 am, y no ta stop mas pa resto di dia.
E sonido constante aki tin nan bida tortura. Door di esey nan no por ni sali bay usa nan hardin, ni habri bentana pa laga aire fresco drenta.
Awor nan kier pa e gai aki wordo saca for di e cas di e bisiña na pueblo di Bad Salzuflen, cu ta keda un tiki pabao di Hannover na Alemania.
“E no ta cuminza te 8:00 am, pasobra e ta cera paden anochi. Pero unavez pafo, e ta canta 100 te cu 200 biaha henter dia,” ta loke Friedrich-Wilhelm a declara na TV Aleman.
“Nos no por usa nos hardin, tampoco habri ningun bentana. E ta insoportable,” el a bisa den entrevista.
Su casa Jutta a agrega: “Ta dificil papia di tortura, pero esey mes ta pasando cu nos.”
Segun nan abogado, Torsten Gieseke a mustra: “Un gai no ta pertenece den un urbanizacion trankil.” Friedrich-Wilhelm a agrega cu un otro bisiña ya caba a bandona e area, pasobra e no por mas cu e cantamento desagradable aki di e gai.
E bisiña Michael D. a wordo entrevista tambe, y el a bisa cu e tin di keda cu e gai, pasobra asina e ta mantene e ordo entre tur su cria di galiñanan. El a argumenta tambe: “E galiñanan mester di e gai, pasobra de lo contrario nan lo pleita y laga otro sin pluma.”
Segun Michael D. tabata na 2018 cu el a inverti den cinco puito pa e parti patras di su cas, pa asina nan por pone webo. Pero pa su sorpresa, un di e puitonan a crece y a converti den un gai, y esaki a laga bisiñanan disgusta.
Friedrich-Wilhelm y Jutta cu a soporta e cantamentonan durante varios aña caba, awor a dicidi cu nan buchi a yena, y nan ta bay presenta e caso aki den Corte contra e doño di Magda. E caso lo wordo trata den Corte di Distrito di Lemgo.
“Nos a haci hopi test. Nos yiunan a haci test, nos bisiñanan tambe, pero nada a logra”.
E noticia tristo ta cu e bisiña no kier deshaci di e gai, pues sea nan tin di siña biba cune, of gana e caso den Corte.
