ORANJESTAD (AAN): Dialuna mainta den “Raad Kamer” esta caso cu ta wordo trata cu portanan sera, a tuma lugar e caso cu Otmar Oduber,
asisti pa abogado mr. Carlo, a cuminsa contra Fiscal di Ministerio Publico. E hecho cu e caso ta portanan sera, ta imposibel pa prensa ta presente.
Informacion cu ta dispone di dje ta mustra cu e caso ta relaciona cu e caso Flamingo, caminda mr. Carlo ta haya cu Fiscal ta tardando hopi cu e investigacionnan cu ta data di 2020. E abogado kier pa Fiscal bisa si tin caso of no pa asina stop di laga Oduber den incertidumbre.
Rechaza peticion aña pasa: Aña pasa na October 2022, mr. Carlo a cuminsa un caso similar y a pidi Hues pa ordena Fiscal pa cera e investigacion. E tempo ey Fiscal a bisa Hues cu ta casi cla e investigacion y cu ta calcula cu na Januari 2023 lo ta cla.
Esey tabata motibo cu Hues a rechaza e peticion di mr. Carlo.
Cuminsa otro caso: E aña aki for di Januari 2023, mr. Carlo tabata puntra Fiscal con a para cu e investigacion caso Flamingo. Mr. Carlo no a keda satisfecho cu e reaccion di Fiscal y na Maart 2023 el a manda peticion na Hues pa instrui Fiscal pa stipula un fecha cu ta cla.
Fiscal a laga sa cu a keda cla na medio Maart 2023 y cu e pakete di documentonan ta hopi grandi. Por a compronde cu ayera durante e caso a cuestiona e tardanza den e investigacion y cu for di 2020 no tin ningun sospecho nobo. Tur cos ta basa riba declaracion di Parlamentario Marisol Lopez Tromp.
Por a compronde cu ainda no tin un fecha stipula pa decision di Hues riba e caso pero cu Hues a bisa cu mas pronto posibel e lo laga tanto mr. Carlo como Fiscal sa ki dia tin decision.
