ORANJESTAD (AAN): Diahuebs mainta e homber K.R. a wordo condena na paga un multa y paga daño na e homber W., kende el a tacha su bon nomber.
Den sala di Corte tabata presente e homber K.R., ex agente di Polis, kende a wordo condena pa a facilita Nelson Andrade radio di Polis y e homber W., ex funcionario di Polis.
SENTENCIA
Hues a bisa cu mescos cu abogado mr. Illes, e ta haya no prueba cu K.R. a haci declaracion cu ta acusa W. di cierto delito durante entrevista 15 October 2021 cu Babu Hoek.
PARCIAL LIBER
Hues a bisa cu no tin grabacion y tampoco den procesverbaal di Polis tin para kico precies K.R. a declara. Pesey Hues a declara K.R. parcial liber.
ATACHA BON NOMBER
Hues a sigui bisa cu e ta haya e resto di declaracion di K.R. a atacha e bon nomber di W. door di bisa cu W. lo a gaña na Landsrecherche y Hues den Corte, kende tabatin e radio horta.
Hues ta haya cu K.R. intencional a haci e declaracion aki cu a bay den aire. Hues a rechaza e ponencia di abogado cu ta bisa cu e entrevista tabata un debate publico na interes general. Hues a mustra cu den e caso penal contra K.R., el a nenga di duna declaracion. Awor, despues cu Hof a condena K.R., el a bay haci declaracion.
Na opinion di Hues, si K.R. kier a haci un declaracion, e mester a generalisa y no bay menciona W. Hues a bisa cu Hof a evalua declaracion di W. y ta haya esaki confiabel.
Pa cu e castigo, Hues a bisa cu e ta tene cuenta cu den comunidad chikito declaracion cu ta tacha bon nomber di un persona, por afecta e persona.
PAGA MULTA Y DAÑO
Hues su decision ta cu e ta confirma exigencia di Fiscal di un multa di 2.500 florin di cual 2.000 florin ta condicional of 50 dia sera. Tambe Hues a aproba e demanda di W. pero solamente 1.000 florin. Hues a bisa cu e ta declara e resto di e demanda no admisibel y cu si W. kier e por cuminsa un caso civil. Hues tambe a pone e medida di pago. El a bisa cu K.R. mester paga na Ministerio Publico e multa y e 1000 florin di daño y Ministerio Publico lo percura pa W. haya e placa.
