El a hinca un otro dama tres biaha cu cuchiu
ORANJESTAD (AAN): E mucha muher S.A.A.H. di 16 aña, riba Diahuebs mainta a scucha Hues confirma e exigencia di Fiscal esta 180 dia di prison, di cual 120 dia ta condicional. E 120 dia condicional tin un periodo di prueba di 2 aña caminda a ordena S.H. pa sigui haya guia di Reclassering, psicologo, psychiater y Fundacion Hunto pa rehabilita di uzamento di droga. Tambe Hues a aproba e demanda di daño di 10 mil florin di parti di mayornan di e dama victima A.
Acusacionnan: Den sala di Corte tabata presente, e sospechoso S.H. acompaña pa su mama y su tata, e mayornan di e victima A., miembronan di Respaldo y un miembro di Reclassering.
E acusacionnan cu Fiscal a presenta contra S.H., kende e tempo ey tabatin 15 aña, ta cu riba e anochi di 28 y 29 September 2024, el a purba di maltrata e homber B. cu un cuchiu. E mesun anochi, S.H. a kibra e glas di porta di e cas di Fundacion Guia Mi, unda B. tabata keda y a horta e smartphone di B.
S.H. tambe ta wordo acusa cu riba 18 October 2024, el a purba mata e dama A., na un lugar publico den Playa, caminda el a hink’e 3 biaha cu un cuchiu.
Zwaai cuchio riba amigo: Hues a haci S.H. pregunta riba e incidente cu a sosode riba e anochi di 28 y 29 September 2024 cu e homber B. S.H. a bisa Hues cu el a haya rabia e dia ey. El a bisa cu e no a pensa promer cu el a actua. Hues a mustra cu for di e relato di Polis, S.H. tabatin un relacion cu B. y na dado momento tabata sospecha cu B. lo tin un otro amiga. S.H. a rabia masha hopi y a bay cas di B. cu un cuchiu.
Riba pregunta di Hues, B. a bisa cu normalmente e ta cana cu un cuchiu. B. a splica cu ora el a yega na e cas, el a bati na e porta y papia cu B. El a mira un dama sali for di baño. El a rabia, saca cuchiu y zwaai cun’e den direccion di B. Hues a pidi S.H. pa mustra e distancia cu e tabata para for di B. y S.H. a lanta para mientras cu e traductor tambe a para pa asina Hues por a mira e distancia. Hues a conclui cu S.H. tabata para mas o menos 1.5 meter dilanti di B. Segun S.H., su intension tabata pa spanta B. y no haci’e daño. El a bisa cu despues di a zwaai cu e cuchiu, el a core bay y bolbe bay bek cerca B. E ora ey S.H. a kibra e glas di e porta, drenta den e cas y el a coy e smartphone di B. cu tabata riba mesa. E kier a mira si B. tabatin contacto cu e otro dama. Ta asina cu unda B. tabata keda, tabata na Fundacion Guia Mi.
Hues a puntra S.H., con e ta pensa di loke a sosode. El a bisa cu e no mester a actua asina.
Hinca dama tres biaha cu cuchiu: Hues a bisa cu 18 October 2024, S.H. tabata na un lugar publico na Playa y tres dama a bay riba dje. Un di e damanan, A., a puntra S.H. si e tabata e ex di B. El a puntra pakico S.H. a coy e cellular di B. S.H. no a contesta y a saca un cuchiu y hinca e dama A. Hues a remarca cu e ta haya e reaccion di S.H. hopi fuerte. Segun S.H., el a kere cu e tres damanan kier a bati’e. El a splica Hues cu e dama a dal’e cu boter cu awa. Hues a mustra cu segun psychiater y psicologo, S.H. a bira agresivo ora el a mira e damanan. S.H. a bisa Hues cu e ta cana cu cuchiu pasobra den pasado un homber kier a bay purba abusa di dje. El a bisa Hues cu e no ta confia. Hues a remarca cu e cuchiu a pone cu awor S.H. ta dilanti Hues.
Hues a puntr’e si ainda e ta cana cu cuchiu. S.H. a bisa Hues cu e no ta cana cu cuchiu mas.
S.H. a bisa Hues cu e ta lamenta loke a sosode pero e momento cu el a mira e 3 damanan y uno cu un boter, yen cos tabata pasa den su cabez. El a haya hopi rabia y a perde cabez. Ariba preguntanan di Hues, S.H. a bisa cu el a sinti su mes amenaza. E tabata sinti cu e 3 damanan kier a gar’e y esun cu a bay papia cun’e, kier a ranca su cabey. E ora ey el a saca cuchiu y hinca.
Victima interna den cuido intensivo: Hues a bisa cu e dama victima A., mester a bay cu ambulance hospital. El a sufri un hinca serio na su lomba cu a causa cu su pulmon a klap sera. Esey a pone cu e victima mester a wordo opera. S.H. a bisa Hues cu ta duel e hopi loke a sosode.
Hues a mustra cu e homber B. a bisa cu el a hala atras ora S.H. a zwaai cuchiu riba dje. Esey pa evita cu e lo a wordo herida. Hues a mustra e amiganan di e victima a bisa Polis cu ora S.H. a saca cuchiu, un di nan a tira awa den su cara di S.H. como defensa. Na opinion di Hues, esaki ta diferente cu loke S.H. a conta. Segun S.H., el a sinti manera el a bisa Hues, esta amenaza. Hues a sigui bisa cu dos turista cu tabata cana ey banda tambe a papia cu Polis, di loke nan a mira S.H. a haci.
Hues a remara, cu si lesa declaracion di e tres damanan, ta haya e impresion cu S.H. a saca cuchiu pa hinca, sin cu tabatin confrontacion. S.H. a bisa Hues cu nan ta gaña. S.H. ta di opinion cu nan tabata kier a bati’e. Hues a bisa cu e turistanan a bisa cu nan tabatin e impresion cu algo lo bay pasa entre e 3 damanan y S.H. Segun e dos turistanan, e damanan tabata papia tabata papia basta fuerte y na dado momento S.H. a saca algo for di su tas y e tres damanan a core. S.H. a core nan tras y ataca un di e damanan. Despues e dama a keda benta abao.
Mama di victima y mama di acusado tabata yora: E mayornan di A., a haci demanda di daño perhuicio. E demanda di daño inmaterial ta 10 mil florin. E mama di e victima A., hopi emociona a bisa Hues cu su yiu a keda cu cicatriznan mahos door cu e yiu ta sufri di keloid. E mama a bisa Hues cu nan a keda hopi afecta. E mama a bisa Hues cu como mama e ta compronde. Por a nota cu den sala di Corte tabata hopi emociona. Esnan presente tabata sinti loke e mama di e victima tabata expresa. Na final e acusado a bisa Hues cu ta duel e hopi loke a sosode.
E mama di S.H. a bisa Hues cu S.H. tabatin hopi problema y no tabata bisa nada. Segun e mama, S.H. no tabata bisa cu e tabata victima di bully na school.
Acusado mester di guia: Hues mustra cu S.H. a keda sera di 20 October te 8 November 2025. Despues a laga S.H. liber pero cu aresto na cas. E no tabata permiti sali. Despues di un periodo a laga S.H. sali. El a haya ayudo di Respaldo y Reclassering. S.H. a splica Hues cu e ta hayando guia con pa controla su rabia. Hues a mustra cu tin raport di Reclassering ta mustra cu S.H. tin problema psychico y mester haya guia y sigui control psychico. Empleado di Reclassering a bisa Hues cu mester stop S.H. tambe riba uso di droga pasobra a constata droga den su systema luna pasa. E empleado ta haya cu mester laga S.H. sigui haci testnan di droga y si ta necesario, S.H. mester haya guia di Fundacion Hunto pa rehabilita di droga. Hasta psycologo di Respaldo a hiba palabra y a mustra cu mester tene cuenta cu S.H. ta autista y cu S.H. mester sigui haya guia.
Fiscal a exigi castigo combina: Fiscal a bisa cu e ta haya legalmente proba e intento di hinca e homber B., e kibramento di glas di porta di e cas unda B. ta keda y e hortamento di e cellular di B. Na opinion di Fiscal si B. no a hala atras, e lo a wordo herida. E caso mas serio ta cu S.H. a hinca e dama A. cu cuchiu diferente biaha. Fiscal ta haya legalmente proba intento di mata. E ta haya cu Hues a bay hopi profundo den e caso caminda por constata cu S.H. a saca cuchiu y a bay ataca tur tres damanan. E dama A. a reacciona door di tira e boter di awa den direccion di S.H. pa scapa e otro dos. S.H. a bay tras di A. y hink’e un biaha den man y dos na lomba parti ariba. Fiscal a bisa cu segun psicologo, S.H. ta sufri di autismo pero psychiater no ta haya esey. Fiscal a bisa cu segun psychiater, S.H. ta sufri di hopi rabia door di cosnan cu el a pasa aden den pasado. Psychiater ta haya cu S.H. ta menos responsabel pa su actonan. Fiscal a bisa cu ta un milager cu A. a keda bibo.
Fiscal a uza castigo hubenil contra S.H., mirando su edad. El a exigi 180 dia di prison, di cual 160 dia ta condicional cu 2 aña di prueba. Fiscal tambe a exigi pa S.H. cay bou guia di Reclassering y haya tratamento na Respaldo. Tambe Fiscal a exigi pa pone prohibicion pa S.H. usa droga y cu S.H. mester haci test di droga.
Fiscal a bisa cu e ta haya cu mester aproba e demanda di daño. E cuchiu cu a kita for di S.H. lo mester keda confisca.
Abogado: Su defensor mr. Hernandez a bisa Hues cu no por proba cu S.H. a haci intento di maltrato severo riba B. E acusado a bisa cu riba un distancia el a zwaai cu cuchiu y no a bay cu intension di a herida B. Segun e abogado, ta solamente B. ta bisa cu el a hala atras. S.H. a bisa cu su intension tabata pa spanta B. door di rabia cu B. tin un otro amiga. E abogado ta haya cu mester declara S.H. liber di e intento di maltrato severo. Mr. Hernandez ta haya proba cu S.H. a kibra e glas di porta y horta e smartphone.
Pa loke ta e caso serio di hincamento, mr. Hernandez a bisa cu e no ta comparti punto di bista di Fiscal cu por papia aki di intento di mata. Na opinion di abogado, no tin ningun indicacion cu S.H. su intension tabata pa purba mata. E abogado ta kere cu aki por papia di intento di maltrato severo. Mr. Hernandes a mustra cu promer cu e damanan a bay riba S.H., nan tabata sigui su tras pa basta rato. Esey a pone cu S.H. tabata sinti su mesa menaza. Mirando e problemanan mental cu S.H. ta sufri di dje, a causa cu el a reacciona di e forma aki. E abogado a bisa Hues cu si S.H. no tabatin e problemanan mental aki, e lo a actua asina. El a mustra cu S.H. tabata victima di bully y un biaha a wordo persigui y mishi door di un homber. Ta pesey S.H. tabata cana cu un cuchiu. Ta door di su estado mental, e tabata cana cu cuchiu tur caminda. E abogado ta haya cu e demanda di daño no ta suficiente splica y pesey ta haya cu mester declara esaki no admisibel.
Sentencia: Hues a sera tratamento di e caso y a dicta sentencia di biaha. Hues a cuminsa cu loke a sosode cu B., tur hende ta di acuerdo di destruccion di glas di porta y horta e cellular di B. Pa loke ta e acusacion intento di maltrato cu un arma.
Hues ta haya cu loke S.H. a haci cu B., esaki ta un intento di maltrato. El a bisa cu S.H. a mustra den Corte con leu e tabata para dilanti B. y a zwaai cu e cuchiu. B. a bisa cu el a hala atras pa no wordo corta. Esey Hues ta considera cu H.S. a purba di herida B. cu cuchiu.
E caso mas serio ta 18 October 2024, caminda S.H. a hinca e dama A. tres biaha cu cuchiu. Hues ta haya cu S.H. a wordo acerca door di e tres damanan y hopi liher S.H. a bay den accion pa hinca. A hinca A. den lomba y man. Esun den lomba a causa cu A. su pulmon a klap. Esaki a pone A. su bida den peliger. Hues no ta haya cu S.H. tabatin intension di mata A. Pero cu S.H. a actua den un forma cu por a causa morto di A. Hues ta haya legalmente proba intento di mata A. Hues a bisa cu mester aplica castigo hubenil y mester wak con mester actua pa algo asina no pasa mas.
For di e raportnan di psychiater, psicologo y Reclassering ta mustra e problemanan cu S.H. tin. Psychiater ta haya cu S.H. ta menos responsabel pa su actonan. Hues a conclui cu e no ta haya cu S.H. mester bay sera bek. Hues a confirma e exigencia di Fiscal. El a condena S.H. na 180 dia di prison di cual 160 dia ta condicional cu 2 aña di prueba. Durante 2 aña di prueba, S.H. ta cay bao guia di Reclassering, Respaldo y mester stop di uza droga y cu ta haci controlnan. Hues a aproba e demanda di daño di 10 mil florin.
