ORANJESTAD (AAN): Fiscal no ta di acuerdo cu e sentencia di luna pasa 21 November 2023, caminda Hues a declara e homber G. di 35 aña liber pasobra na opinion di Hues no tin suficiente prueba.
Fiscal a exigi 6 aña di prison: Dia 14 November 2023, tratamento di e caso a tuma lugar caminda Fiscal a bisa cu e ta haya legalmente proba cu G. a abusa di su dos yiunan homber C. (di 8 aña) y E. (du 7 aña) entre 2021 y 28 Maart 2023. Fiscal a exigi 6 aña di prison y a pidi Hues pa aproba 20 mil florin di e demanda di daño y cu medida di pago.
Sentencia: Dia 21 November 2023, Hues a bisa cu G. ta wordo acusa di a abusa di su mesun 2 yiunan homber. Na opinion di Hues, no por spera cu e dos yiunan lo bay duna declaracion detaya consistente. Hues ta haya cu mester anda cauteloso cu e declaracionnan ora ta trata di e acusado G. cu ta desmenti categoricamente.
Declaracionnan trece duda: Hues a mustra cu e mucha homber E. (7) a wordo interoga den un studio special. El a bisa cu G. a siña nan mishi cu otro y mustra nan video porno. El a bisa tambe cu G. a mishi cu nan. El a bisa cu G. lo a penetr’e di atras pero e no a sinti nada. El a bisa cu esaki tabata sosode ora e mama no tabata na cas. Segun E., el a bisa su mama pero e mama no a haci nada. Ora a repasa e declaracion pa E., e tabata sacudi cabez manera NO. Hues a sigui bisa cu C. tambe a declara cu G. a penetr’e y cu el a sinti dolor. El a bisa cu ora e mama tabata bay supermercado, esaki tabata sosode.
E mama T. a wordo interoga y el a bisa cu el a bin haya sa despues cu su ruman muher a haya riba Tablet cu e muchanan tabata wak caminda a filma nan ta mishi cu otro. T. a bisa cu e tabata bay supermercado pa mas o menos 20 minuut y bolbe.
Hues ta haya cu den declaracion di e muchanan tin cosnan cu ta contradeci otro. Tambe cu E. tabata sacudi cabez.
Hues ta duda cu den un periodo di 20 minuut, manera T. ta bisa cu el a bay supermercado, e abusonan tabata tuma lugar. Na opinion di Hues, remarcabel ta con C. ta bisa cu e no sa con su mama T. a haya sa, siendo cu E. ta bisa cu el a bisa e mama. E mama ta bisa cu ta su ruman muher a bis’e.
No tin prueba convincente: Hues ta haya cu no tin prueba convincente. El a bisa cu por bien ta cu e muchanan a mira videonan pornografico riba e Tablet. Remarcabel ta cu riba e video caminda e muchanan tabata haci actonan inmoral, por scucha un hende puntra si nan a caba cu nan tarea. E momento ey a mira e muchanan actua manera cu nan a wordo sorprendi.
Hues a declara G. liber y pa e wordo poni den libertad di inmediato. Por a scucha famianan di G. tabata grita di alegria.
A apela sentencia: Por a compronde cu Ministerio Publico a apela e sentencia. Esey ta nifica cu otro aña por spera cu Hof di Corte Superior lo bin Aruba pa trata e caso full di nobo. E hecho cu Hues di Corte den Promer Instancia ta bisa cu no tin suficiente prueba, ta laga un buraco pa Ministerio Publico apela. Tres Hues di Hof lo bay trata e caso full di nobo y lo mester dicidi si G. ta culpable of no.
