ORANJESTAD (AAN): Manera DIARIO a menciona den otro articulo, e acusado Michael Gibson a ricibi 15 aña di castigo pasobra el a tira y mata un Canades/Chines na un apartamento na Jaburibari na 2017.
El a apela e sentencia y awor ta ser trata den Corte Superior.
Durante tratamento di e caso den Corte Superior, Hof a mustra cu Gibson ta worde busca pa autoridadnan Canades pa un otro caso di asesinato.
Por a compronde cu autoridad Canades ta sospecha Gibson cu na April 2016, el a tira mata Julian Weekes (27). Ta sospecha cu esaki ta relaciona cu problema di gang caminda Gibson lo ta forma parti di e otro gang The 6ix.
E victima Julian Weekes a core despues di a worde tira pero a cay muri ariba parkinglot di un pomp di gasoline. Investigacion di autoridad Canades ta mustra cu ta Michael Gibson (Tyke) ta e sospechoso. Su siguiente aña 2017, Gibson a worde poni riba e lista di esnan mas busca pa autoridad Canades ya cu tabata sospecha cu el a bay for di Canada.
Na Mei 2017, a sosode e lamentable asesinato di Thuy Quach (25) den un apartamento na Jaburibari. Despues cu Polis a detene Gibson, autoridadnan Canades a pidi su extradiccion pero autoridad di Aruba a informa cu e lo mester responde pa e asesinato na Aruba promer y despues e lo por worde extradita pa Canada.
Esaki ta splica pakico tin tanto vigilancia ora ta hiba Gibson for di KIA pa Corte. Tambe esaki ta splica pakico Gibson ta bisa cu e no kier papia y ta prefera sinta su castigo na Aruba. E sa kico ta sper’e na Canada.
Riba e potret aki por mira Michael Gibson hunto cu e victima Julian Weekes cu e lo a mata na Canada tambe.
