Nan ta wordo acusa di labamento di placa y falsificacion durante 2017 y 2021
ORANJESTAD (AAN): Mañan mainta, Diahuebs 1 September 2022, Alan Howell y Jacqueline van Putten mester presenta den sala di Corte di Husticia di Aruba, pa e caso penal cu Ministerio Publico a cuminsa contra nan.
LABAMENTO DI PLACA
DIARIO por a compronde cu Ministerio Publico ta acusa ambos persona di a participa na un organizacion criminal. Tambe Ministerio Publico ta acusa nan di desfalco, labamento di placa y falsificacion den e periodo entre 2017 y 2021.
E periodo menciona Howell tabata lider y Parlamentario di partido POR y president di e Stichting. Jacqueline van Putten tabata e secretaria di e Stichting.
CASO LO NO WORDO TRATA AINDA
Investigacion cu DIARIO a haci ta mustra cu e caso lo no wordo trata Diahuebs mainta. E caso ta bin dilanti como “regie zitting”. Esey ta nifica cu basicamente e sospechosonan y nan abogado mester presenta den Corte y lo bay palabra kico lo mester investiga ainda promer cu e tratamento di e caso.
DIARIO por a compronde cu abogado di Howell, mr. Canwood, a haci peticion na tanto Ministerio Publico como Hues di Corte di Husticia, cu e kier scucha testigo.
Diahuebs mainta, mr. Canwood lo mester splica pakico e kier scucha testigo y despues Fiscal lo tin oportunidad di reacciona riba esaki. Na final Hues ta tuma un decision y lo bay fiha un fecha pa tratamento.
