El a bisa Hues cu e homber ta un pedofil cu mester haya castigo
ORANJESTAD (AAN): Diabierna mainta mama di un mucha muher cu a bira victima di abuso sexual di un homber, a pidi Hues pa castigo pisa e homber M. cu e ta yama un pedofil.
Un dama a hiba palabra pa e mama di un mucha muher di 15 aña cu a wordo abusa pa e homber M. di 39 aña di edad. Manera ta conoci, a introduci ley nobo caminda awor e victima di un delito, por expresa den Corte, kico tur el a pasa aden.
Mama a pidi pa castiga “Pedofil”: Un dama Doctorandus. a papia pa e mama. El a lesa e declaracion di e mama cu a wordo traduci na Hulandes riba papel. E mama ta di Ecuador.
E dama a bisa Hues cu como mayornan a confia e acusado M. cu nan yiu muher pasobra e tambe tin dos yiu muher. E mayornan tabata consider’e manera un padrino, caminda nan yiu muher A., tabata bay cuida e baby di M.
E mama ta considera M. un pedofil cu a abusa di su yiu muher y a menaza su yiu pa no papia. E mama ta sigui bisa cu si no a descubri e mensahenan riba WhatsApp cu M. tabata manda pa e mucha A., te ainda M. lo ta abusa di mi yiu. E mama a bisa cu su casa semper lo ta rabia cu M. pa loke el a haci cu su yiu. E mucha awor tin trauma.
Purba cumpra famia: E mama a bisa cu e señora di M. a acerca nan pa purba cumpra nan pa laga M. bay y cu lo paga nan. E mama a expresa den tono emociona: “No tin placa pa paga e daño cu a causa na nos yiu. Esaki ta escandaloso y no por permiti cu un pedofil ta cana rond”.
E mama ta considera M. peligroso. El a bisa cu e no sa ki curazon M. tin pa ta abusa si mi yiu siendo cu e tin un yiu muher di casi mesun edad.
E mama a pidi Hues pa duna castigo severo pa nunca mas M. no haci esaki. El a pidi pa prohibi M. bin den cercania di nan yiu. E mama a bisa Hues cu e no kier pidi ningun cent sino husticia.
Mama a cay flauw: Despues di tratamento di e caso, Hues a bisa cu e ta pospone e caso un rato pa bay pensa si ta dicta sentencia di biaha. E momento ey, e mama tabata hopi tristo y ta yora. El a bay sinta pafor di sala di Corte. Ora Hues a bolbe, e mama no kier a drenta sala di Corte mas. Despues di e sentencia, el a wordo informa di e decision y a cay flauw. Miembronan di CEA a core duna asistencia y a yama Ambulance pa busca e mama hiba hospital.
Esaki ta un muestra con duro caso di abuso di mucha ta afecta un mayor.
