Hues ta confirma exigencia di Fiscal
ORANJESTAD (AAN): Diabierna merdia Israel Paesch, a presenta dilanti Hues pa scucha su sentencia. Hues a confirma e exigencia di Fiscal y a condena Israel Paesch na 13 aña di prison pa a tira mata su primo Rene Paesch riba 23 Augustus 2025.
FISCAL A EXIGI 13 AÑA DI PRISON
Luna pasa tratamento di e caso a tuma lugar caminda Fiscal ta haya cu aki no por papia di asesinato sino mata. Fiscal ta haya cu Israel no a actua premedita o sea no a planea pa mata Rene. Fiscal a sigui bisa cu e no ta haya cu Israel a actua den defensa propio. Fiscal ta haya cu ta Israel mes a busca e confrontacion. El a mustra cu despues di e problema na Lekker Bar, Israel a tuma venganza contra Rene y a provoca Rene. Fiscal a bisa cu e no ta kere declaracion di Israel na Polis. Fiscal a mustra cu Rene no tabatin arma y a bisa Israel pa no tir’e. Fiscal ta haya cu Israel mes a bay tira riba e cas na Sabania Abao cual Rene tabata cuida pa un hende y asina a provoca Rene pa bay na cas di Israel. Fiscal a bisa cu Israel por a los tiro di advertencia, core bay, yama pa ayudo. Pero Israel a los 4 tiro riba e parti ariba di curpa di Rene. Fiscal a exigi 13 aña di prison y pa aproba e daño material exigi di 11 mil florin y pa pone medida di pago.
SENTENCIA
Ayera merdia 1’or, Hues a bisa cu e ta haya Israel ta culpabel di a mata y no asesina Rene Paesch. Na opinion di Hues no tabatin plan o sea premedita y cu Israel a haci e delito grave aki su so sin ayudo di otro hende. Hues a bisa cu defensa mr. Arendsz Marchena a bisa cu Israel a actua den defensa propio.
RECHAZA DEFENSA PROPIO
Hues a bisa cu Fiscal ta haya cu no por papia di defensa propio pasobra ta Israel a provoca. Hues a bisa cu Rene no a bisa, mi ta mata bo. Sino cu Rene a bisa: “tira mi no!”. Esey ta diferente cu loke Israel ta bisa cu Rene a bisa: “ mi ta mata bo”. Hues a bisa cu Rene no tabata arma. Rene a baha for di brommer y bay riba Israel. Hues no ta haya cu por papia di defensa propio. Hues no ta haya cu tabatin un situacion di emergencia caminda Israel mester a actua den defensa propio.
Hues a mustra cu abogado mr. Arendsz Marchena a bisa cu durante 8 aña, Rene tabata presiona Israel y cu e dia ey Israel no tabata soporta mas. Hues a rechaza e defensa.
CASTIGO DI 13 AÑA DI PRIZON
Hues a bisa cu Fiscal a exigi 13 aña di prizon. Pa cu e castigo, Hues a bisa cu Israel a tira su primo mata y esaki ta un caso hopi grave. Tambe el a mustra cu a haya 465,2 gram di cocaina den apartamento di Israel. Hues a bisa cu e ta tene cuenta cu Israel ta menos responsabel pa su actonan manera psychiater a mustra. Tambe Hues a tene cuenta cu e conflicto di añanan largo entre Israel y Rene. Hues a bisa cu e ta tene na cuenta cu Israel a yega di haya castigo caba pa un caso di arma. Hues ta haya e castigo exigi pa Fiscal na su lugar. Hues a condena Israel Paesch na 13 aña di prizon. Hues a bisa cu e ta aproba e daño material na algo mas di 8 mil florin y si Israel no paga e lo mester bay 69 dia sera. Hues tambe a impone e medida di pago.
