ORANJESTAD (AAN): Mundo ta desaroyando y cambionan ta wordo introduci. Mescos cu ya no ta usa e palabra ‘choller’ mas sino ‘Adicto Ambulante’, awor Ministerio Publico no ta usa e termino di ‘violencia domestico’ mas, pero di awor en adelante e ta bira conoci como ‘Violencia Relacional’.
Husticia sa cu Violencia Relacional ta un problema hopi grandi na Aruba. Cada biaha, comunidad ta worde confronta cu e tipo di violencia aki. Es mas, ta hopi instancia ta envolvi den e enfoque, tanto den esfera di prevencion como di represion. Ministerio Publico ta e ultimum remedium den e cadena aki.
Procurador General di Aruba a caba di manda instruccion pa tur instancia envolvi, pa indica cu nan tin un cambio di maneho pa cu Violencia Relacional entrante Diamars 1 di Februari 2022.
Segun PG, violencia relacional ta socede na gran escala na Aruba, y e ta un problema social. Na varios ocasion pueblo ta keda den shock di casonan cu tin final hopi serio y castigable. E solucion pa e problema aki ta rekeri un enfoque multidisciplinario y di termino largo.
Aki ta hopi instancia ta hunga un rol, tanto den e prevencion di violencia relacional como tambe e represion. E ultimo recurso ta ora di envolvi Ministerio Publico dn e asunto.
Awor cu e cambio di maneho pa violencia relacional, Ministerio Publico lo bay contribui tambe den e enfoque di violencia relacional. E señal cu Ministerio Publico kier manda ta cu violencia relacional tin di stop y castiga tambe.
E designacion di maneho ta bin den sentido di articulo VI. di Constitucion di Aruba, articulo 14 di Codigo Penal, articulo 3 y 4 di ley di Ministerio Publico, y articulo 8 di ley di Polis.
E designacion tin di bira un maneho unifica di impone castigo, y stimula un actuacion mas efectivo y eficiente di Polis y Ministerio Publico ora di reacciona riba violencia relacional.
E cambio aki tin di bay contribui tambe na:
(1) Reconoce violencia relacional.
(2) Purba stop inmediatamente (e menaza) di violencia relacional.
(3) Evita cu casonan ta sigui ripiti via intervencion specifico.
(4) Restablece bek e norma di husticia viola.
(5) Aumenta e disponibilidad di victimanan pa denuncia.
(6) Garantiza e seguridad di e victima, principalmente di victimanan menor di edad.
(7) Garantiza seguridad di muchanan cu ta testigo di violencia relacional.
E instruccionnan ta bin cu reglanan pa e investigacion y persecusion y ta formula e condicionnan pa aplicacion di e cooperacion local entre Polis, Ministerio Publico, Stichting Reclassering & Jeugdbescherming, y partnernan di e sector social y di cuido. Tur instancia ta opera for di su propio responsabilidad.
Un enfoque multidisciplinario den e cadena di cuido y penal mester yuda preveni violencia relacional y cu esaki lo bay ripiti. E casonan complica di violencia relacional ta wordo discuti den un Safe House.
