Mester manda señal pa Tourguides cu ta iresponsabel
ORANJESTAD (AAN): Hues no a haya e castigo exigi pa Fiscal ta hustifica e seriedad di e caso y pesey a subi castigo pa e homber D.C., kende a worde haya culpable di a causa cu un turista a hoga na Moro, na Boca Keto.
E acusacion contra D.C. ta cu riba 8 Juli 2021 como guiador di turista y pa negligencia a laga turista Tores landa caminda ta prohibi y e turista a fayece.
Guiador ta culpabel: Luna pasa tratamento di e caso a tuma lugar y Fiscal a bisa Hues cu no ta acusa D.C. cu intencionalmente a mata Tores. Loke a pasa ta worde considera un negligencia cu a causa morto di Tores. Esaki ta culpa di D.C.
Como guia, por spera mucho mas di D.C. cu conoce e area y sa cu tin borchi cu ta prohibi pa landa. Tores hunto cu su amiga a contrata D.C. pa un caminata. Nan a bula na Natural Pool y ora di bay back, D.C. y Tores a bula for di baranca. Tores a hoga. Fiscal a bisa cu e ta haya cu D.C. ta ofrece guia professional na turista. Hende ta confia den un guia cu mester splica e lugarnan cu ta bishita.
E Tourguide mester splica turista kico por y kico no por y unda tin e limitacion. Fiscal ta haya cu D.C. ta responsabel pa e hendenan cu e ta guia. Caminda nan a bula na Moro ta prohibi. Tin un borchi cu ta mustra esaki. Ta cerca di e borchi aki nan a bula. D.C. a bisa cu e ta splica kico tin na Moro y tin posibilidad pa bula si laman ta calmo.
E laman ta bruto y tin un coriente cu ta hiba bo afor.
Fiscal ta haya cu ta dificil pa D.C. dicidi cu Tores lo por bula. E turista no conoce e lugar y no sa kico por spera. D.C. si sa di esaki y tog a dicidi di bula den awa cu Tores. Fiscal ta haya cu D.C. a actua iresponsabel pa bisa Tores pa bula for di baranca. E hecho cu el a splica Tores con pa bula y con pa landa back, no ta haci otro. Apesar cu D.C. a purba saca Tores for di laman no ta haci otro. Ta door di D.C. a causa morto di Tores.
Exigi castigo: Fiscal a mustra cu no ta promer biaha cu hende a hoga na e barancanan na Moro. Pesey e ta haya cu D.C. ta culpable pa morto di Tores. Turista ta confia riba e guiador. Guia mester percura pa e turista pasa bon y yega sano y salvo. Fiscal ta spera cu e caso aki lo ta un señal na tur guiador di turista riba nan responsabilidad pa cu turistanan.
Aki un hende a perde su bida. Fiscal a bisa cu el a papia cu coleganan riba e caso pa asina pensa kico lo ta un castigo husto. Fiscal a exigi castigo condicional pasobra e ta haya cu esaki mester ta un aviso. El a exigi 6 luna di prison condicional cu un tempo di prueba di 2 aña di prueba.
Sentencia: Recien Hues a dicta sentencia y a bisa cu a keda legalmente proba cu D.C. a causa morto di Tores door di culpa. El a mustra cu abogado mr. Illes a bisa cu mester declara D.C. liber pasobra ta Tores mes a dicidi di bula for di baranca y no ta culpa di Tores.
Negligencia di guidador: Hues ta di opinion cu D.C. como guiador ta bay cu turista riba un caminata na costa Norte. El a bisa cu ta posibel di landa na Moro Beach pero laman ta bruto. Nan a bay natural pool y despues a bolbe Moro Beach. E ora ey el a bisa cu e laman ta mas calmo. A bula den laman y olanan a hala nan afor. Tores a hay’e den problema. D.C. a purba yud’e pero el a hoga. Hues a bisa cu ta conoci cu na costa Norte ta hopi peligroso. Tin borchi ta prohibi pa bula for di baranca. D.C. tabata sa esaki pero ta haya cu como guiador e lo por.
Culpa di morto di turista: Na opinion di Hues, e hecho cu Tores kier a bula no ta kita afor e culpa di D.C. como guia professional. Hues a bisa cu riba video por mira cu na momento cu Tores y D.C. a bula, e laman tabata calmo pero un rato despues a bira bruto. Hues ta haya cu door di a laga Tores bula a neglisha e peliger di e laman. A tuma risico cu a causa cu Tores a hoga.
Hues a subi castigo: Pa cu e castigo, Hues a bisa cu e ta tene cuenta cu door di negligencia a causa cu un persona a perde su bida tragicamente y laga su pareha atras. Esaki lo por afecta turismo di Aruba. Hues ta haya cu turista mester por confia cu por bin Aruba y cu ta sigur.
Hues tambe a tene cuenta cu e caso a afecta D.C. cu pa resto di su bida mester atende cu esaki. El a tene cuenta cu ta promer biaha D.C. a cay sera.
Pa loke ta e castigo, Hues a bisa cu contrario na exigencia di Fiscal, no por duna castigo condicional. Hues ta haya cu castigo condicional, no ta haci husticia na loke a pasa.
Hues ta haya cu mester manda un señal bon cla cu guiador di turista no por actua iresponsabel. Hues a condena D.C. na 3 luna di prison condicional cu 2 aña di prueba. Ademas Hues a condena D.C. na 120 ora di trabao pa comunidad y si no cumpli cu esaki, lo mester bay 60 dia sera.
