Apesar di protesta di Fiscal y abogadonan
*Lo no bay trata e casonan separa tampoco den Corte!
*Huez ta OK pa trata e plan di Fiscal pa kita 941 mil di Benny
ORANJESTAD (AAN): Apesar di cu tanto Fiscal como e abogadonan a expresa nan desacuerdo pa cu e planning di Hues pa tratamento di e caso penal Avestruz, Hues a pone tur esakinan un banda y a mantene su planning. Por a ripara cu Fiscal no a keda nada contento.
No a papia nada di caso cu Ministerio Publico: Hues riba Diahuebs mainta a bisa cu el a haci un proposicion dia 14 di Juni 2022 pa e tratamento di e caso penal Avestruz y dia 15 Juni 2022, Fiscal y abogadonan a expresa cu nan ta contra e plan aki.
Hues a enfatisa cu e no a papia nada di e plan di e caso cu Ministerio Publico. Hues a rechaza e sugestion di mr. Carlo.
Ta asina cu mr. Carlo dia 15 Juni 2022 a remarca na Hues cu con por ta cu Abogado General durante interogacion di sospechosonan den caso Avestruz a bisa cu e tratamento di e caso lo cuminsa 5 September 2022 y abogadonan ta bin tende di esaki dia 14 di Juni 2022. Por a nota cu Hues no a gusta e remarke aki y el a pone esaki den su decision.
Mantene plan pa caso Avestruz: Pa loke ta e desacuerdo di tanto Fiscal como abogadonan riba e plan di Hues pa trata e caso penal Avestruz, Hues a bisa cu e no por complace tur hende den e plan. El a bisa cu e mester tene cuenta cu Corte di Husticia. Hues a bisa cu abogadonan a pidi pa tin suficiente tempo pa prepara nan defensa y Fiscal kier pa trata e caso promer cu November 2022 pasobra un di e Fiscalnan lo bolbe Hulanda.
Hues a remarca cu e no ta mira caba tratamento di e caso promer cu November 2022. Hues a dicidi di mantene su plan y a bisa cu tratamento di e caso ta cuminsa 7 y 8 di September 2022 y lo sigui October y November 2022.
Hues a instrui Fiscal: Hues a rechaza e peticion di parti di abogado pa trata casonan separa. Hues a bisa cu no ta practico pa trata casonan separa.
Hues a presenta henter e plan con e kier pa tratamento di e caso penal tuma lugar y a instrui Fiscal pa percura pa tin requisitorio pa cada caso cla.
Por a nota cu Fiscal no a keda contento cu e decision. Dia 15 Juni 2022, Fiscal a reclama cu e plan di Hues pa algun luna trata e caso y a bisa cu e no kier tin requisitorio apart sino un requisitorio pa tur sospechoso. Awor Hues a pone tur esaki un banda y a haci un yamada urgente riba Fiscal pa tin requisitorio pa cada caso y cu November 2022, contrario na e peticion di Fiscal, lo sigui cu tratamento di e casonan.
Lo bay scucha testigonan extra: Hues ayera a honra e peticion di abogadonan mr. Oomen y mr. Carlo pa scucha algun testigo extra. Hues a bisa cu e ta instrui Hues Comisario pa scucha e testigonan O., C., y d C., mientras cu e otro testigonan lo wordo rechaza.
Tur declaracion di testigo pa abogadonan: Hues tambe a honra e peticion di abogadonan pa nan haya declaracion di tur e testigonan. El a ordena pa tur e declaracion di e testigonan wordo facilita na e abogadonan.
Demanda pa kita casi 1 miyon for di Benny: Hues a bisa cu e ta bay di acuerdo cu e punto di bista di Fiscal pa trata e parti di kita pertenencia di Benny Sevinger, despues cu a trata e parti penal di caso Avestruz. Dia 15 di Juni 2022, Fiscal a bisa cu e ta bay demanda pa kita 941 mil florin for di Benny Sevinger.
Hues a caba su decision bisando cu dia 5 September 2022 pa 11’or di mainta lo topa atrobe den sala di Corte pa mira con e situacion di e investigacionnan pa cu e caso ta. El a pone dia 6 di September 2022 como un dia di reserva y dia 7 y 8 lo cuminsa cu e tratamento di caso Avestruz.
