Caso den Corte
ORANJESTAD (AAN): E homber di inicial C.P. di 20 aña, riba Diahuebs mainta tabata para ariba y insisti den Corte, cu e no a saca ningun arma pa menaza hende sino un yabi di los wiel di auto e tabatin. Fiscal no ta kere C.P. y a exigi 4 luna di prison.
Hues ta haya C.P. culpabel di a menaza cu algo cu ta parce un arma pero no ta un arma di candela. Hues no a sigui Fiscal su exigencia y a condena C.P. na castigo condicional y trabao pa comunidad.
Acusacion: E acusacionnan cu Fiscal a presenta contra C.P. ta cu entre 26 Mei 2025 y 18 Juni 2025, C.P. tabatin un arma di candela. Tambe Fiscal ta acusa C.P. cu riba 26 Mei 2025, el a saca un arma pa e homber T. y menaza T. cu esaki.
Menaza cu arma: E acusado C.P. a bisa Hues cu e dia ey, e, su yiu homber y su ruman homber tabata na un Supermarket pa cumpra bleki di gas pa airco. El a keda den auto warda y na dado momento su yiu a sali y bisa C.P. cu nan no por haya e bleki di gas. C.P. a bisa cu net e momento ey e homber T. a yega. C.P. a baha lomba sunu bay den e supermercado y a haya e bleki di gas.
Segun C.P. ora e ta na cashier pa paga, e homber T. lo a grit’e: “Kico bo ta wak?”
C.P. a bisa Hues cu e padrastro di T. a yena nan cabez contra C.P. cu antes tabata yuda e padrastro cu piscamento y cria bestia. Tin manera un problema entre T. y C.P. Segun C.P. a bisa, cu den e Supermarket el a cana bay na T. y a puntr’e kico ta e problema y pa T. paga loke el a bin cumpra.
Despues cu T. a paga, el a bisa C.P.: “Ora mi haya bo so, lo bo bay wak.” Segun C.P., el a sali pafor, T. a bolbe bis’e cu ora e haya C.P. su so e lo bay wak. E ora ey C.P. a cana bay na e auto y a bolbe puntra T. kico ta e problema. E momento ey un otro auto a yega y 4 amigo di T. a baha. E ora ey C.P. a core bay su auto y a coy e yabi di los wiel di auto. El a bisa Hues cu el a haci esey pasobra e grupo ta 5 contra e so.
Segun C.P., e hombernan tabata papia cosnan y C.P. a subi auto y bay. T. lo a bisa cu C.P. lo a saca un arma di candela y arma esaki. Hues a bisa cu e amiga di T., L., tambe a bisa asina. C.P. a bisa Hues cu esey no ta berdad pasobra L. tabata sinta den e auto y con e por a mira cu C.P. a saca un arma. Hues a mustra cu e ruman di C.P. a bisa Polis cu ta un yabi di los wiel di auto, C.P. a coy y nada di arma.
Hues a bisa cu for di camera di seguridad di e Supermarket, Polis a mira C.P. cu algo parecido na un arma. Segun C.P., esey tabata e yabi di los wiel cu el a pone den su carson. Hues a bisa cu na Hues Comisario C.P. a bisa cu e tabata un pistol di gas. C.P. a bisa Hues cu su yiu tabatin esey den auto pasobra nan a caba di bin for di cunucu. C.P. a bisa Hues cu ora Polis a bay haci investigacion na su cas a haya varios di e pistolnan aki.
Hues a remarca cu un yabi di los wiel ta hopi mas grandi cu un pistol. C.P. ta para riba cu e no a saca pistol sino tabatin un yabi di los wiel.
Fiscal: Fiscal a bisa Hues cu e ta haya legalmente proba e dos acusacionnan contra C.P.. El a bisa cu T. a haci denuncia cu el a mira C.P. saca un arma y arma esaki. E amiga di T. tambe ta bisa asina. Fiscal a bisa cu riba video di seguridad, por mira cu C.P. tabatin algo parecido na un arma di candela. Fiscal a sigui bisa cu no a mira cu C.P. a arma esaki. Fiscal ta haya esaki ta un caso serio.
Na opinion di Fiscal, no tin prueba cu ta un arma di berdad. Pero si ta algo parecido na un arma, cu ta spanta hende y por causa trauma. Fiscal a bisa cu el a busca orientacion den leynan di Hulanda y a exigi 6 luna di prison pa C.P.
Abogado: mr. Paesch a bisa Hues cu e ta laga na Hues pa dicidi. E abogado a bisa cu si sera C.P. lo perhudica C.P. den su trabao. E abogado ta haya cu un castigo condicional ta na su lugar cu un tempo di prueba. Tambe trabao pa comunidad y bou guia di Reclassering.
Hues a remarca na Fiscal cu pa menaza cu arma falso segun ley Hulandes ta duna 120 ora di trabao pa comunidad y no castigo di prison. Fiscal a bisa Hues cu e 120 ora ta 4 luna di prison. Hues a bisa cu esey no ta loke Hulanda ta duna.
Sentencia: Hues a sera tratamento di e caso y a dicta sentencia di biaha. Hues ta haya cu riba video ta mustra cu C.P. ta coy algo parecido na un arma. Hues ta haya legalmente proba cu C.P. tabatin algo cu a menaza e homber T.
Na opinion di Hues, no por prueba cu C.P. tabatin un arma di candela. Hues ta haya cu esaki ta un forma serio di menaza. Hues a bisa cu e no ta sigui Fiscal. Hues ta haya e castigo exigi mucho halto. Hues ta haya mas na su lugar un aviso. Hues a condena C.P. na 10 dia di prison di cual 7 dia ta condicional y 2 aña di prueba. Tambe Hues a condena C.P. na 40 ora di trabao pa comunidad of 20 dia cera.
