Den e caso di e dos polisnan envolvi den e Caso Lanoy
ORANJESTAD (AAN) Manera ta conoci, Diabierna awo e tratamento di e caso di matamento di e hoben Ayden Lanoy den cual tin dos polis envolvi, a keda postpone pa Februari 2026.
Abogado mr. Vito Carlo hunto cu mr. D. Illes ta e abogadonan cu ta atende cu e defensa di e dos polisnan cu a tira mata Lanoy. Den e caso aki a hiba palabra y a declara den entrevista cu DIARIO, mr. Vito Carlo, ken a splica cu aunke Huez no a bay di acuerdo nan argumento, a duna nan e libertad pa entrega nan mes analisis di e videonan.
“Pasobra esey ta bay ta e esencia di e caso; loke ta wak y scucha riba e videonan, anto semper y cuando nos entrega un rapport di e compania cu ta renombra, confiabel, e lo por reconoc’e, tum’e den consideracion ora di defensa”, mr. Vito Carlo a expresa.
Tocante locual e abogado di Hulanda ta bisa “cu e material ta papia pa su mes”, mr. Vito a señala cu esey ta e problema, pasobra e ta papia pa su mes, pero tin un discrepancia entre audio cu video, pasobra loke bo ta scucha no ta loke bo ta wak.
“Ta p’esey Landsrecherche a haci un investigacion di solamente loke bo ta wak, anto nos ta di opinion cu, naturalmente no tur cos cu nan ta wak nos ta wak”, mr. Vito Carlo a comenta. P’esey nan ta bay haci nan investigacion y nan lo presenta nan rapport dia 20 of 23 di Februari cu e caso ta bolbe wordo trata den Corte, y en principio, despues di tres siman tin sentencia. Asina e abogado mr. Vito Carlo a señala.
