A base di ley penal, no por papia di abuso di mucha --- ORANJESTAD (AAN): Diahuebs mainta e hoben B. di 18 aña a presenta den Corte pa scucha decision di Hues den e caso penal cu Ministerio Publico a cuminsa contra dje.
B. ta wordo acusa di a haci actonan inmoral cu un mucha bou di 12 aña y a tene relacion sexual cun’e tempo cu e mucha ta ariba di 12 aña pero menor di edad. E tempo cu B. tabatin 16 aña esaki a sosode. Ta asina cu B. a bisa den Corte cu e mucha a bis’e na 2019 ora cu nan a vrij otro cu e tin 15 aña mescos cu B. Algun luna despues, B. a haci 16 aña y despues cu nan a tene nan promer relacion sexual, e mucha muher a bis’e cu e tin 12 aña. No mucho tempo despues, e relacion a caba pasobra e mama di e mucha a bay haci denuncia.
EXIGENCIA DI FISCAL
Algun siman pasa tratamento di e caso aki a tuma lugar caminda na opinion di Fiscal, den e relato di KZP ta papia di 2018 tempo cu e mucha no tabatin 12 aña. Fiscal no ta haya esaki proba. El a bisa cu e hoben B. ta papia di Januari 2019.
Fiscal ta haya legalmente proba cu entre December 2018 y Juli 2019 cu B., e tempo ey 16 aña a tene relacion sexual cu e mucha di 12 aña. Esaki ta algo serio. Fiscal a bisa cu e inmoralidad na Aruba ta un problema grandi. E caso aki ta serio pasobra a haci videonan con nan tabata tene relacion cu no sa unda esakinan ta bay para. Fiscal ta haya cu B. mester tabata sa mihor. El a tuma B. na malo.
Pa cu e castigo, Fiscal a bisa cu e ta tene cuenta cu B. mes tabata menor di edad. Esaki ta haci e caso diferente pasobra e mucha tabatin 12 y B. 16. Fiscal a exigi castigo condicional di 1 luna di prison cu tempo di prueba di 2 aña. Fiscal a bisa cu esaki ta un aviso.
HOBEN DECLARA LIBER
Ayera mainta Hues a bisa cu no tin prueba cu B. lo a haci actonan inmoral cu un mucha bou 12 aña. Na opinion di Hues, si a keda proba cu B. a haci actonan inmoral cu mucha muher 12 aña y a tene relacion sexual cun’e. E tempo ey B. tabatin 16 aña.
Hues a mustra cu e muchanan a tene relacion sexual pa promer biaha. El a bisa cu mirando declaracion di B. y e mucha muher, e pregunta ta si e relacion sexual por wordo considera castigabel pa ley.
Hues a bisa cu ley penal tey pa proteha mucha jong entre 12 y 16 aña di integridad sexual. Pasobra nan no ta suficiente grandi pa pensa riba consecuencia. Tambe ley ta bisa cu ora trata di muchanan cu nan edad no ta mucho varia, no por papia di abuso.
Hues a mustra cu for di tratamento di e caso a sali na cla cu via social media na December 2018, e muchanan a conoce otro. Na Januari 2019, nan a topa otro y e mucha muher a bisa cu e tin 15 aña mescos cu B. Na Maart 2019, B. haci 16 aña y un luna despues nan a tene relacion sexual. Na opinion di Hues, aki ta trata di dos menor di edad cu tabata bayendo school y a gusta otro y kier tene relacion di sexual cu otro. Hues su decision ta cu no por considera e hechonan como actonan inmoral y a declara B. liber.
