Abogado mr. Emerencia a convence Hues cu no tin prueba di sosten
ORANJESTAD (AAN): E homber Dominicano biba na Aruba, R. di 34 aña, Diabierna mainta na yoramento a bisa Hues cu e no a abusa di su yiu muher di 7 aña y cu e no ta un pedofil. El a admiti cu accidental ora el a bay duna e mucha T. di 11 aña un sunchi, e mucha a move y el a sunchi e mucha na su boca. Fiscal a haya R. culpabel di tur dos acusacion y a exigi 6 aña di prison.
Abogado mr. Emerencia a bisa Hues cu no tin prueba di sosten cu R. a abusa di su mesun yiu. Tur declaracion ta bin for di e yiu cu segun mr. Emerencia, a worde instrui door di su mama W. Hues a dicta sentencia di biaha y a declara R. liber di a abusa di su yiu pasobra no tin prueba di sosten y a condena R. na trabao pa comunidad pa a sunchi e mucha. Diabierna mes, R. a worde poni den libertad.
Acusacionnan: Tratamento di e caso a dura di mainta te den oranan di merdia. Den sala di Corte tabata presente e dos mamanan y tambe e pareha actual di R. y e ruman homber di R. E acusacionnan cu Fiscal a presenta contra R. ta:
(*) Abuso sexual di su mesun yiu muher menor di edad entre Mei 2022 y Maart 2023.
(*) Actonan inmoral cu un mucha muher T. (11) na Mei 2022.
Abogado kier scucha testigonan: Hues a bisa cu e por a compronde cu anterior abogado mr. Emerencia kier a scucha testigonan. Ta asina abogado a bin cu e testigonan cu e kier scucha. E abogado a bisa Hues cu e dama H. ta pareha di R. y conoce e yiu muher di R. bon, pasobra e mucha sa bay keda cerca nan. A ser bisa cu Polis a yama H. pa interogacion y ora a bisa Polis cu e ta bin cu abogado mr. Emerencia, nan a hala atras.
Abogado mr. Emerencia a bisa Hues cu H. conoce e mucha hopi bon y por bisa con e relacion entre e acusado R. y e yiu ta. E otro testigo ta e ruman homber di R., kende conoce e mucha hopi bon pasobra tur ora e tabata bay na e cas.
Corte no ta scucha testigonan: Fiscal a reacciona cu e no ta mira motibonan hustifica pa scucha e dos testigonan. Hues a pospone e caso pa evalua si ta aproba e scuchamento di e testigonan. Hues a rechaza peticion.
El a mustra cu Hues Comisario anterior a rechaza esaki y Hues mes no a scucha argumentonan cu ta hustifica pa scucha e testigonan. E no ta mira interes di scucha e testigonan.
Abusa di muchanan: Hues a bisa cu R. ta admiti cu a sunchi e mucha T. na boca. R. a splica cu su costumber ta cu e ta braza y morde su rumannan y famia na cachete. E dia ey, nan a bay den cunucu. E mucha T. a pidi R. pa nan a bay cana. E mama L. a keda y ora e cos a sosode, diripiente L. y e homber a presenta eynan.
Despues ora a bay na fiesta, L. a bay cu e mucha di biaha den baño. Hues a bisa cu e mama a haci denuncia. El a bisa cu na e fiesta e tabata sinti falta di T. Despues T. a conta L. cu R. a sunchi e den boca. Hues a bisa cu miembronan di KZP a papia cu e mucha T. kende a bisa cu R. a dun’e sunchi den boca y el a spanta. R. a bisa cu T. a bras’e y ora e tabata kier sunchi T. na su cachete, T. a move cabez y accidental R. a sunchi na boca.
Segun R., el a keda den shock y a bisa T. pa no bisa nada. E mama di T. tabata presente den Corte y tabata hari ora R. tabata declara, pa mustra cu no ta berdad. Hues a mustra cu T. a duna declaracion cu R. tabatin su mannan tin’e y a cuminsa sunchi na su boca y a tene su parti patras. Segun R. ta ora e mucha T. a cuminsa cana, su man accidental a mishi cu su atras pero nada intencional.
Mama di mucha a instiga: Durante interogacion di Hues, R. a bisa cu e conoce e mama di T. hopi bon cu tabata su pareha. El a bisa cu ultimo tempo nan relacion no tabata bon y e ta kere cu e mama a instiga e mucha contra dje.
Hues a bisa cu e dama W. a haci denuncia contra R. cu 10 Mei 2023 tabata na fiesta y bisa cu su yiu muher no kier a bay keda cerca su tata R..
E mucha e bisa cu R. a bis’e cu e mester kita su paña y a mishi cu su partinan intimo y tabata sunchi na su boca. Miembronan di KZP a interoga e mucha y el a bisa cu su tata tabata haci cosnan di adulto cun’e. El a bisa cu R. tabata haci actonan inmoral cun’e, sunchi na su boca y mishi na su partinan priva. Tambe e mucha a bisa cu e tata R. tabata hinca su parti intimo den su parti intimo y tabata haci un poco dolor. El a bisa cu e tempo ey e tabatin 6 aña.
Homber na yoramento ta desmenti: Ta asina cu e tata R. a desmenti categoricamente. El a bisa cu ta e mama cu su partner tabata instiga su yiu contra dje. El a bisa cu su yiu muher a bis’e cu su mama a bis’e cu su tata su pareha ta mahos. Na yoramento R. a bisa cu e declaracion di su yiu ta haci’e hopi dolor. El a enfatisa cu e no ta un pedofil. Hues ta haya cu e asunto ta bay hopi leu pa e yiu ta declara algo asina contra su tata.
Hues a mustra cu tin investigacion medico riba e mucha y e resultado ta cu no tin ningun penetracion. Ta asina cu R. tin 5 yiu. R. a bisa cu e ta traha 16 ora pa dia, haciendo 2 trabao pa asina mantene su yiunan.
Fiscal: Fiscal a bisa cu R. ta worde acusa di a abusa di su mesun yiu muher. E mucha na dado momento tabata yora ora cu e mester bay keda cerca su tata. E mucha a bisa cu su tata lo ta haci cosnan di adulto cun’e. E mucha tabatin 7 aña y ora el a worde interoga e tabatin 8 aña.
Ta asina cu e acusado R. ta desmenti tur cos. R. a bisa cu e tin problema cu e mama di su yiu, T. Fiscal ta haya cu sentimentonan di famia no por haci nada cu esey. E ta haya cu no tin suficiente indicacion cu e muchanan a worde instrui pa duna declaracion. Fiscal ta haya cu R. a abusa di su mesun yiu muher. Pa loke ta e mucha T., e mucha a conta con R. a dun’e sunchi na boca na e fiesta na cunucu. Fiscal ta haya cu esaki tambe ta legalmente proba.
Fiscal ta haya R. culpabel pa tur dos acusacion. Na opinion di Fiscal, R. tabata pensa pa satisfase su mes. Ta un hecho cu muchanan lo por keda afecta pa resto di nan bida. Casonan asina ta causa hopi preocupacion den comunidad. Fiscal ta haya cu R. a abusa di e confianza cu e muchanan tabatin cun’e. Fiscal a menciona diferente sentencia y un recien caminda un tata a worde condena 6 aña di prison pa a abusa di su yiu. Fiscal a exigi pa R. 6 aña di prison.
Abogado: mr. Emerencia a bisa cu R. ta worde acusa di a abusa di su yiu muher y den un otro caso di a haci acto inmoral cu un mucha. E abogado a bisa cu R. ta desmenti categoricamente di a abusa di su yiu y cu e accidental a sunchi e mucha na su boca. E abogado a mustra cu e mama di e yiu di R. tin relacion problematico cu R. El a bisa cu W. a hasta menaza R. cu un cuchiu. E relacion a caba tempo cu e yiu tabata un baby. E problemanan cu e mama W. a sigui.
E acusado R. a bisa con W. cada vez ta pinta R. scur riba facebook. E abogado a describi situacion familiar entre R. y W. caminda tin 3 yiu. Na 2022, R. tabata traha 16 ora pa mantene famia. Nan tabata keda na cas di e tanta di W. y R. a busca un apartamento na Santa Cruz cu su pareha nobo N. E pareha nobo di R., N. tin reglanan cu e muchanan no ta haya cellular pa ta mira riba nan. E muchanan no tabatin problema pa bay cerca R.
Ta e aña aki diripiente e mucha ta nenga di bay keda cerca su tata R. E tata a keda sorprendi y afecta cu su yiu ta bisa cu su tata R. a abusa di dje. E abogado a cuestiona e hecho cu su peticion pa laga psycologo y psychiater evalua e muchanan y tambe pa scucha e pareha di R. y su ruman homber, esakinan a worde nenga. E ta haya cu esakinan ta stroba R. den su derecho di defensa. Abogado ta duda den declaracion di e mucha T. E abogado a bisa Hues cu e muchanan a worde bisa kico nan tin cu bisa contra R. E abogado cu cantidad di copianan a mustra con e mucha tabata riba cellular caminda tin weganan porno cu nan tabata haci.
E abogado a señala cu tur prueba ta bin tras declaracion di e mucha yiu di R. so. Un testigo no ta suficiente. No tin pruebanan di sosten. E abogado a mustra tambe cu e mama a interoga e yiu di R. y pone esaki riba media. Tur esaki e abogado ta considera cu e mama a prepara e yiu pa declara contra R. Pa loke ta e acusacion di a sunchi, e abogado a bisa cu R. a splica bon cla cu accidental el a sunchi e mucha na su boca. E abogado ta conclui cu R. mester worde declara liber di e acusacionnan.
Tata declara liber: Hues a pospone e caso pa pensa un rato y a bolbe. El a sera tratamento di e caso y a dicta sentencia di biaha. Hues ta haya legalmente proba cu R. a sunchi e mucha. Pa loke ta e acusacion di a abusa di su yiu muher, Hues ta haya cu no tin prueba di sosten. El a bisa cu tin declaracion di e mucha pero no tin pruebanan di sosten. No tin prueba di abuso. Hues a declara R. liber di e acusacion di a abusa di su yiu muher. El a condena R. na 100 ora di trabao pa comunidad of 50 dia sera. Ayera tardi mes R. a worde laga den libertad.
