Hende homber mester paga bon tino y pidi e mucha cedula
ORANJESTAD (AAN): Tin un desaroyo preocupante ta sosodiendo den comunidad caminda den Corte ya tin varios caso trata di homber cu ta tene relacion sexual cu mucha muher bou di 16 aña. Aki no ta papia di pedofile sino muchanan muher bou di 16 aña cu ta busca relacion cu homber adulto y ora e relacion sali na cla, mayornan di e mucha ta haci denuncia na Polis y e homber ta wordo deteni.
Mucha muher a gaña su edad: Recien den Corte di Husticia a trata dos caso di abuso di mucha muher bou di 16 aña. Den un caso, e acusado di inicial I. di 21 aña a bisa Hues cu e mucha muher a bis’e cu e tin 17 aña y ta bay haci 18, siendo cu e mucha tabatin 14 aña.
Hues a puntra e acusado kico el a haci ora cu un homber y hasta e mama di e mucha a bisa cu e mucha tin 14 aña. E acusado a bisa Hues cu el a kere den palabra di e mucha ya cu e mucha a bis’e cu e tabatin relacion caba cu un homber di 24 aña.
Ley ta proteha mucha: Fiscal a bisa Hues den Corte cu segun ley, I. mester a percura pa sa e edad di e mucha. Fiscal a mustra cu ley ta proteha muchanan bou di 16 aña. Esaki ta pa proteha muchanan cu ta bay haci cosnan cu no ta na su lugar.
Fiscal a splica cu segun ley, e acusado tin e obligacion pa haya sa cuanto aña e persona cu e tin relacion cu ne tin. Fiscal ta haya cu e acusado I. no por bay tras di palabra di e mucha. Fiscal a bisa cu aki ta uza e ley penal cu ta proteha mucha cu lo por ta gaña nan edad pa tin relacion cu un persona adulto.
Mucha muher kier relacion cu homber adulto: E otro caso cu a trata ta e acusado H. di 25 aña cu a tene relacion cu un mucha muher di 15 aña. Den e caso aki, H. a admiti di tabata sa cu e mucha tabatin 15 aña pero cu e y e mucha “a stima otro”. Den e caso aki, e tata a bin haya H. scondi den cashi di paña di su yiu muher y a yama Polis.
Den e caso aki, Fiscal a remarca cu e diferencia di edad ta 10 aña. Aki atrobe Fiscal a mustra cu ley tey pa proteha mucha pa tene relacion sexual tempran. Na opinion di Fiscal, un homber di 25 aña mester sa cu esey no por.
Homber mester pidi cedula: Durante tratamento di e casonan, e abogado mr. Lotter Homan a bisa Hues cu e ta haya cu e caso aki di su cliente I., ta un señal bon cla cu hombernan awor mester pidi cedula of pasaporte di e dama pa mira cuanto aña e tin promer cu dicidi di tin un relacion.
Esaki ta un observacion hopi bon. Tin varios caso ultimamente ta bin dilanti caminda e acusado ta bisa cu e mucha a bis’e cu e tin 17 aña. Apesar di cu e mucha kier pa tin un relacion, e homber mester ta bon na altura cu, tin relacion cu un mucha bou di 16 aña ta castigabel pa ley y cu e homber ta bay sera.
E por ta mustra fastioso pa bay ta pidi cedula of pasaporte, pero mihor preveni cu despues lamenta dilanti Hues y haya castigo di prison.
