Ta keda un castigo condicional di 325 dia pa 2 aña
ORANJESTAD (AAN): Hues ta haya cu e homber H. di 25 aña ta culpabel di a tene relacion sexual cu e mucha muher R. di 15 aña entre April 2023 y Juni 2023. Tambe cu H. a resisti contra su detencion ora cu Polis a bay detene. Sinembargo Hues no a sigui e exigencia di Fiscal. Hues a condena H. na un castigo combina cu ta encera cu ayera mes el a haya su libertad pero ta keda colga riba su cabez un castigo condicional di 325 dia pa un tempo di prueba di 2 aña.
Fiscal: Tabata dia 9 di Februari 2024, tratamento di e caso a tuma lugar caminda Fiscal a bisa Hues cu e ta haya legalmente proba cu H. tabatin relacion cu un mucha di 15 aña. E diferencia di edad ta 10 aña.
Fiscal a mustra cu ley tey ta pa proteha mucha contra tene relacion sexual tempran. Fiscal ta haya cu un homber di 25 aña mester sa cu esey no por y H. tabata sa esey.
Homber haya scondi den cashi: Fiscal a bisa cu e tata di e mucha a bin haya H. scondi den cashi di camber di R. y a yama Polis mesora. H. a resisti contra su detencion. E tata di e mucha R. tabata na cas tur rabia ora el a descubri H. scondi den cashi. Fiscal a sigui bisa cu e mucha R. a divulga cu ta 3 biaha nan tabatin relacion sexual.
Fiscal a mustra cu segun psycologo, H. tin limitacion den inteligencia y no ta completamente responsabel.
Psycologo ta haya cu H. mester haya guia. A haya potret di R. sunu den smartphone di H. y pesey e smartphone mester keda confisca. Fiscal a exigi a 24 luna di prison di cual 12 luna ta condicional y 3 aña di prueba. Durante e 3 aña di prueba, H. ta cay bao guia di Reclassering manera e raportnan ta bisa.
Sentencia: Diabierna mainta Hues a bisa cu e ta haya H. culpabel di a tene relacion sexual cu nu mucha di 15 aña. Tambe cu H. a resisti contra su detencion ora Polis a bay detene na cas di e mucha.
Hues ta haya cu H. no a realisa cu loke el a haci por afecta e mucha. Hues a mustra cu ley ta proteha mucha muher bao di 16 aña.
Castigo: Pa cu e castigo, Hues a bisa cu e ta tene cuenta cu H. ta un first offender y durante tratamento di e caso, H. a mustra cu e ta lamenta kico el a haci. Hues a bisa cu e pareha tabatin relacion sexual y e mucha muher no tabata kier pa detene H. y kier sigui tin relacion cu H.
Hues a mustra riba e raport di Reclassering cu ta mustra cu e chens pa H. ripiti algo asina ta hopi abao. Hues tambe a tene cuenta cu psycologo a conclui cu H. ta menos responsabel pa su actonan y cu ta bon pa H. cay bou guia di Reclasering pa haya guia.
Hues a condena H. na 18 luna di prison di cual 325 dia ta condicional cu 2 aña di prueba. Durante e temporada di prueba, H. ta guia bou guia di Reclassering. E sentencia ta encera cu Diabierna mes H. a haya su libertad pero ta keda e 325 dia condicional pendiente pa 2 aña.
