Mientras cu Procurador General a exigi 74 luna di prison y detencion di biaha
ORANJESTAD (AAN): Recientemente, Hof di Corte Superior a dicta sentencia den e apelacion di Procurador General (PG) contra e sentencia di Hues di Corte den Promer Instancia, cu a declara e homber G. liber di a abusa di su dos yiunan homber. E sentencia di Hues di Corte den Promer Instancia tabata 21 November 2023, caminda mester a laga G. liber.
PG A EXIGI CASTIGO Y DETENCION DI BIAHA
Despues di tres aña, e caso ta wordo trata den Corte Superior, caminda PG a bisa e tres Huesnan cu ta forma Hof, cu e ta haya G. culpabel di a abusa di su dos yiunan y cu e tabatin peliculanan di pornografia den su “tablet”. PG a exigi 74 luna (6 aña y 2 luna) di prison y orden di detencion di biaha den sala di Corte di G.
NO TIN SUFICIENTE PRUEBA
Siman pasa, Hof a dicta sentencia caminda Hof ta bisa cu e ta confirma e sentencia di Hues di Corte den Promer Instancia y ta rechaza e exigencia di PG.
Hof a bisa cu no tin suficiente prueba legal cu G. a abusa di su dos yiunan homber. Hof ta mustra cu e dos muchanan, nan declaracionnan ta diferencia riba puntonan crucial. Ademas Hof ta haya cu e dos muchanan nan declaracionnan tin discrepancia y tin contradiccion remarcabel. Hof a mustra cu esaki tambe ta remarcabel ora compara e dos muchanan nan declaracion compara cu loke nan mama ta declara. Hof ta bisa cu e hecho cu no tin prueba di sosten, no tin prueba legal cu G. a abusa di su dos yiunan.
Hof a sigui bisa cu loke PG a presenta durante tratamento di e caso, no ta pone Hof yega na un otro conclusion. Hof a mustra cu loke a constata den e “tablet” y e cellular di G., no ta duna prueba di sosten contra G. pa abuso di su yiunan. Hof a sigui bisa cu mescos ta conta pa loke PG a trece padilanti di e reaccion di e muchanan ora a haya video caminda nan tabata haci cosnan sexual cu otro. Hof tambe a mustra cu e investigacion extra cu a haci riba e e-mail di e homber G. no ta suficiente prueba.
“TABLET” TA KEDA CONFISCA
Hof a bisa cu e asunto di e “tablet”, tin pornografia cu ta castigabel y como tal e “tablet” no por bay bek pa G. E “tablet” ta keda confisca.
HOF TA DECLARA HOMBER LIBER
Hof su decision ta cu ta declara G. liber di e acusacionnan di abuso di su yiunan homber. Hof ta rechaza e exigencia di PG pa detencion di biaha di G.
