Nan a haci 7 asalto arma cu violencia na casnan
ORANJESTAD (AAN): Hof di Corte Superior, recien a dicta sentencia pa un grupo di Venezuela biba na Aruba, kendenan a apela nan castigo pa un serie di asalto arma cu violencia cu nan a haci na cas di famia. E mayoria di e grupo ta homber. Solamente un muher tin den e grupo.
E castigo cu nan a haya dia 23 Juni 2021 di Corte den Promer Instancia ta: D.J.R. 10 aña, J.V.V. 8 aña, C.V.V. 10 aña, J.P.B. 14 aña , A.D.B. 12 aña, M.G.A. 10 aña, e muher A.W. 5 aña, F.M.S. 4 aña.
A exigi pa subi castigo: Procurador General (PG) durante tratamento di e caso den Corte Superior, a bisa cu e caso ta hiba e nomber ‘Caso Falcon”. En total 7 caso di asalto arma cu violencia a sosode entre Mei y Augustus 2020, tambe algun tabatin arma di candela.
PG a mustra cu e grupo aki a causa inseguridad den comunidad. E ta haya cu mester baha cu man duro.
PG a exigi pa A.D.B. 16 aña, pa J.P.B. 16 aña, pa M.G.A. 14 aña, pa D.J.R. 14 aña, pa A.W. 11 aña, pa J.V.V. 10 aña, pay F.M.S. 5 aña, pa C.V.V. 14 aña.
Hof a rechaza exigencianan di PG: Hues di Corte di Husticia di Aruba, via video conference a lesa e sentencia di Hof di Curacao pa e acusadonan, kendenan tabata den un oficina na KIA.
Acusado A.D.B. cu a worde condena na 12 aña di prison. PG a apela y a exigi 16 aña di prison. Hof ta haya e casonan hopi serio. Ta trata aki di asalto arma cu violencia den casnan di famia. Hof a mustra cu pa asalto arma normal tin castigo di 4 aña. E castigo ta subi ora asalto arma sosode den cas y den un organizacion professional. Hof a condena A.D.B. conforme e sentencia di Corte den Promer Instancia esta 12 aña di prison.
E muher A.W., cu a worde condena na 5 aña di prison, PG a apela y a exigi 11 aña. Hof a tene cuenta cu A.W. a coopera cu e investigacion y ta reconoce su culpabilidad y a arepenti. Hof tambe a tene cuenta cu A.W. no a haci violencia den cas. Tambe a tene cuenta cu e situacion personal di A.W., kende tin 2 yiu y un ta hopi chikito. Hof a confirma e sentencia di Corte den Promer Instancia esta 5 aña di prison.
F.M.S. a apela su castigo di 4 aña y PG. a exigi 5 aña di prison. Hof ta haya cu F.M.S. tabata forma parti di e grupo pero no a drenta den e casnan. Hof a condena F.M.S. na 3 aña di prison.
J.P.B. cu a worde condena na 14 aña di prison, a apela. PG. a exigi 16 aña di prison. Hof a tene cuenta cu e cantidad di asaltonan arma y e gravedad. Hof ta haya cu aki por papia di un organizacion criminal. Hof a confirma e sentencia di 14 aña di prison.
J.V.V. cu a worde condena na 8 aña di prison, a apela. PG a exigi 10 aña di prison. Hof ta haya cu J.V.V. tambe tabata forma parti di un organizacion criminal pero pa un periodo cortico. Hof a tene cuenta cu tabatin un asalto arma cu J.V.V. no a drenta e cas. Hof a condena J.V.V. na 6 aña di prison.
C.V.V. cu a worde condena na 10 aña di prison, a apela y PG tambe. PG a exigi 14 aña di prison. Hof ta confirma e castigo di 10 aña di prison di Corte den Promer Instancia.
M.G.A. a worde condena na 10 aña di prison y PG a apela. PG a exigi 14 aña di prison. Hof ta haya cu M.G.A. a forma parti di un organizacion criminal. A tene cuenta cu e funcion di M.G.A. y e violencia cu a usa durante e asaltonan arma. Hof a confirma 10 aña di prison di Corte den Promer Instancia.
D.J.R. a worde condena na 10 aña di prison y el a apela y PG tambe. PG. a exigi 14 aña di prison. Hof a tene cuenta cu D.J.R. a reconoce su culpabilidad. Tambe a tene cuenta cu e violencia cu a usa den e casnan. Hof a condena D.J.R. na 9 aña di prison.
Hof a reduci tres di e castigonan mientras cu a confirma e castigo di e otro cinco. Tur e exigencianan di PG a worde rechaza.
